پاکستان اور عرب امارات کے درمیان ریل انفراسٹرکچر میں جدت اور علاقائی رابطے مضبوط کرنے پر اتفاق

پاکستان کے وزیر مملکت برائے خزانہ و ریلوے بلال اظہر کیانی اور متحدہ عرب امارات کے وزیر توانائی و انفراسٹرکچر سہیل محمد المزروعی کی ابوظہبی میں ملاقات ہوئی ہے۔

وزارت ریلوے کی جانب سے جمعے کو جاری بیان کے مطابق ملاقات میں ریل انفراسٹرکچر کو جدید بنانے اور بنیادی ڈھانچے کی ڈویلپمنٹ میں دوطرفہ تعاون کو وسعت دینے پر غور کیا گیا۔

وزیر مملکت نے متحدہ عرب امارات کی حکومت اور وزیر توانائی و انفراسٹرکچر سہیل محمد المزروعی کا ’گلول ریل انفراسٹرکچر‘ کانفرنس اور نمائش منعقد کرنے پر شکریہ ادا کیا۔

انہوں نے انفراسٹرکچر کے حوالے سے لیے گئے اقدامات کو سراہا بالخصوص اتحاد ریل پروجیکٹ جس کو بلال اظہر کیانی نے علاقائی روابط کے لیے ایک ماڈل قرار دیا۔

دونوں رہنماؤں نے تجارت اور رابطوں کے فروغ سمیت پائیدار اقتصادی ترقی کے مقصد سے پاکستان کے ریل نیٹ ورک کی اپ گریڈیشن کے لیے تعاون مضبوط کرنے پر تبادلہ خیال کیا۔ 

وزراء نے پاکستان اور متحدہ عرب امارات کے درمیان مضبوط برادرانہ تعلقات کا اعادہ کیا اور باہمی خوشحالی کو آگے بڑھانے اور ماحولیاتی ذمہ داریوں کو مدنظر رکھتے ہوئے ٹرانسپورٹ کے فروغ کے لیے مشترکہ عزم کا اظہار کیا۔