مسلسل حمایت پر حکومت پاکستان کا سعودی عرب اور اسلامی تعاون تنظیم سے اظہار تشکر
جدہ (محمد عامل عثمانی) کشمیر کمیٹی جدہ نے 25 اکتوبر 2017 ء کو سعودی عرب میں کشمیر بلیک ڈے کے سلسلے میں اجلاس کیا اور کشمیر کے لوگوں کے ساتھ ان کی خود مختاری کی جدوجہد میں مکمل یکجہتی کا اظہار کیا۔کمیٹی نے متفقہ طور پر ایک قرارداد میں وادی کشمیر میں انسانی حقوق کی خلاف ورزیوں کی مذمت کی اورہند سے مطالبہ کیا کہ کشمیر میں مجموعی، منظم اور ریاستی اسپانسر انسانی حقوق کی خلاف ورزیوں کو فوری طور پر روکنے کے لئے بین الاقوامی انسانی حقوق کی تنظیموں کو ریاست تک محفوظ رسائی کی اجازت دی جائے۔کمیٹی نے ہندوستانی افواج کی جانب سے لائن آف کنٹرول (ایل او سی) پر غیر جانبدار فائرنگ کی مذمت کی ۔کمیٹی نے زور دیا کہ ہندوستانی قبضہ شدہ کشمیر میں موجودہ تباہی ہند کی ہٹ دھرمی اور جموں و کشمیر کے تنازعات کو حل نہ کرنے کی وجہ سے ہورہی ہے ۔کمیٹی نے ہند پر زور دیا کہ کشمیر پر اقوام متحدہ کی سلامتی کونسل کے قراردادوں پر عمل درآمد اور جموں و کشمیر کی حتمی حیثیت وہاں کے لوگوں کی مرضی سے ہی طے ہوسکتی ہے۔ کمیٹی نے بین الاقوامی برادری کو بھی توجہ دلائی کہ وہ ہندپر زور دے کہ وہ کشمیر کے بارے میں اقوام متحدہ کی سلامتی کونسل کی قراردادوں کو نافذ کر کے مسئلہ حل کرے ۔کشمیر کمیٹی نے کشمیری جدوجہد کے لئے پاکستان کی غیر مشروط سیاسی، اخلاقی اور سفارتی مدد کی قرارداد کی تعریف کی ۔کمیٹی نے کشمیری جدوجہد کی مسلسل حمایت پرسعودی عرب اور اسلامی تعاون تنظیم OICکا بھی شکریہ ادا کیا۔کمیٹی نے کشمیرکے بارے میں مسلسل معاونت کیلئے پاکستان کے قونصل جنرل کاخصوصی شکریہ ادا کیا. اجلاس میں قونصل جنرل شہریاراکبر خان کے علاوہ ڈپٹی قونصل جنرل سعیدسرور، کرنل خالد فتح العظیم اور پریس اتاشی ارشد منیر موجود تھے جبکہ کشمیر کمیٹی کے صدر مسعوداحمد پوری ’ جنرل سیکریٹری منیر احمد گوندل کے علاوہ دیگر ارکان میں محمد فاروق الراعی ، عامر غنی میر ، راجہ محمد زریں خان، غلام نبی بٹ، نصر اقبال سردار خان، چوہدری اعظم ،سردار اقبال یوسف اور پرویز یوسف مسیح شامل تھے ۔
