ہالی ووڈ: بڑے بجٹ کی کئی فلمیں ریلیز کے لئے تیار

 2019ءمیں ہالی ووڈ کی کئی اہم فلمیں ریلیز ہو چکی ہیں اور کئی بڑی فلمیں سکرین کی زینت بننے والی ہیں۔دلچسپ بات یہ ہے کہ اس سال ہر کسی کی پسند کے مطابق کوئی نہ کوئی فلم ریلیز ہورہی ہے جس کے لیے شائقین خاصے پُرجوش ہیں اوران کا بے تابی سے انتظار کررہے ہیں ۔ اس حوالے سے ہم کچھ تفصیلات پیش کررہے ہیں جس سے فلم بینوں کو معلوم ہوسکے گا کہ رواں سال کے آخر تک کون کون سی اہم فلمیں سینما گھروں کی زینت بنیں گی اور شائقین کب انہیں دیکھ سکیں گے ۔

• ایونجرز: اینڈ گیم

 ایکشن اور تھرل سے بھرپورایونجرز اینڈ گیم 24 اپریل سے ریلیز ہو رہی ہے۔ سنیما شائقین اپنے پسندیدہ کرداروں کو اس فلم میں ایک ساتھ دیکھ سکیں گے۔اس فلم کو اینتھونی روسو اور جو روسو نے ڈائریکٹ کیا ہے اور فنکاروں میں رابرٹ ڈاونی، کرس ایونز، کرس ہیم ورتھ، جیریمی رینر،سکارلٹ جونسن شامل ہیں۔

• گاڈزلہ،کنگ آف دی مونسٹرز

گاڈزلہ سیریز کی نئی سائنس،فکشن اور ایڈونچر فلم گاڈزلہ، کنگ آف دی مونسٹرز 30 مئی کو ریلیز ہو رہی ہے۔ یہ فلم 200 ملین ڈالرز کے بجٹ سے تیار کی گئی ہے۔ فنکاروں میں چارلس ڈانس، سیلی ہاکنز،ویرا فارمگیا شامل ہیں۔

• جان وک تھری

ایکشن فلم جان وک تھری رواں سال 16 مئی کو سنیما گھروں کی زینت بن رہی ہے۔ 20 ملین ڈالرز کے بجٹ سے تیار جان وک سیریز کی پہلی فلم 2014ءمیں ریلیز ہوئی تھی اور اس نے 88 ملین ڈالرز کا بزنس کیا تھا جبکہ 2017ءمیں ریلیز ہونے والی جان وک ٹو نے 171 ملین ڈالرز کمائے اور اس پر 40 ملین ڈالرز لاگت آئی تھی۔ ہالی ووڈ سٹار کیانو ریو کے ساتھ ہیلی بیری بھی اہم کردارنبھاتے ہوئے نظر آئیں گی۔ '' اسپیڈ'' اور ''دی میٹرکس'' جیسی کامیاب فلموں سے شہرت حاصل کرنے والے ہالی ووڈ اسٹار کیانو ریو کو اس فلم سے بہت امیدیں وابستہ ہیں۔

• سٹار وارز 9

سٹار وارز کے شائقین کو اب چند ماہ اور انتظار کرنا پڑے گا۔ ان کی پسندیدہ سیریز کی اگلی فلم اس سال کے آخر میں 19 دسمبر کو ریلیز کی جا رہی ہے۔ ڈیزی رڈلی، مارک ہیمل،جان بوئیگا، اوسکر اساک اور دیگر اہم کردار فلم کی کامیابی کے لئے پرامید ہیں۔

• مین ان بلیک انٹرنیشنل

ایکشن،سائنس اورفکشن فلم مین ان بلیک انٹرنیشنل 13 جون سے سنیما گھروں کی زینت بن رہی ہے۔ فلم کی کاسٹ میں کرس ہیمزورتھ، لیام نیسن اور ریبیکا فرگوسن جیسے بڑے اداکار شامل ہیں۔

• جمان جی تھری

فلم بینوں کو اس سال کولمبیا پکچرز کی جمان جی سیریز کی تیسری فلم جمان جی تھری بھی دیکھنے کو ملے گی۔ دی راک کے نام سے مشہور ڈیوائن جانسن اس فلم میں بھی اہم کردار میں نظر آئیں گے۔ فلم کے دیگر کرداروں میں جیک بلیک، کیون ہارٹ اور بالی ووڈ سٹار پریانکا چوپڑا کے شوہر نک جونز بھی شامل ہیں۔ جمان جی تھری 13 دسمبر کو ریلیز ہو رہی ہے۔
ان فلموں کی ریلیز کے شیڈول کو دیکھتے ہوئے شائقین کو پہلے سے منصوبہ بندی کرنا ہوگی تاکہ کہیں اس کی ٹکٹ نہ نکل جائے اور وہ اپنی پسندیدہ فلم کو بڑی سکرین پر دیکھنے سے محروم نہ رہ جائیں ۔