جازان کمشنری میں کرونا سے بچاﺅ کی مہم 

گورنر جازان شہزادہ محمد بن ناصر نے ریجن کے ہوائی اڈوں پر کرونا وائرس سے بچاﺅ کے لیے احتیاطی تدابیر اختیار کرنے اور آنے والے چینی ملازمین کا مکمل طبی چیک اپ کرنے کی خصوصی ہدایات جاری کی ہیں۔

جازان ریجن کے داخلی اور بین الاقوامی ہوائی اڈوں پر وزارت صحت کے تعاون سے خصوصی ڈیسک قائم کر دیے گئے ہیں۔ عربی ویب نیوز 'سبق' کے مطابق گورنر جازان کی جانب سے کرونا وائرس سے بچاﺅ کے لیے جاری ہدایات میں مزید کہا گیا ہے کہ ریجن میں ترقیاتی منصوبوں سے منسلک چینی باشندے جو چین سے آرہے ہیں ان کا مکمل طبی معائنہ کیا جائے۔

گورنر جازان نے بری سرحدی چوکیوں کے علاوہ بندرگاہوں پر متعین اہلکاروں کو بھی ہدایات جاری کی ہیں کہ وہاں آنے والوں کا مکمل طبی معائنہ کیا جائے اور کوئی بھی مشتبہ کیس سامنے آنے پر بروقت اطلاع دیتے ہوئے انہیں فوری طور پر مخصوص علاج فراہم کیا جائے۔

واضح رہے جازان کمشنری کا صنعتی علاقہ کافی وسیع ہے وہاں مختلف فیکٹریوں میں ہزاروں کی تعداد میں چینی باشندے کام کر رہے ہیں۔ کمشنری میں' بیشہ جنرل اسپتال ' ہی واحد ہسپتال ہے جو علاقے کی طبی ضروریات پوری کرتا ہے۔
ہسپتال کی جانب سے اس امر کا خصوصی اہتمام کیا جارہا ہے کہ ریجن میں قائم لیبر کیمپوں کا دورہ کر کے وہاں رہنے والے چینی اور دیگر کارکنوں کا طبی معائنہ بھی کیا جائے۔

گورنر جازان نے بھی اس امر کی تلقین کی ہے کہ لیبر کیمپوں میں جہاں چینی باشندے مقیم ہیں ان کا طبی معائنہ کیا جائے ۔ اس ضمن میں طبی کمیٹی کا کہنا ہے کہ ایئر پورٹ اور بری سرحدی چوکیوں پر احتیاطی تدابیر اختیار کر تے ہوئے جراثیم کش ادویات کے سپرے کرنے کی مہم بھی جاری ہے۔

جراثیم کش ادویات کے سپرے وقتا فوقتا شہر کے تمام علاقوں میں کیے جاتے ہیں تاکہ وبائی امراض پر قابو پایا جاسکے۔ بلدیہ میں ماحولیات کے شعبے کی جانب سے ریجن میں جراثیم کش ادویات کے سپرے کے لیے خصوصی انتظامات کیے گئے ہی۔ سپرے ٹیمیں اپنے شیڈول کے مطابق گھروں اور علاقے کا اسپرے کرتی ہیں۔ 

دریں اثناء ادارہ امور صحت کی جانب سے احتیاطی تدابیر کے حوالے سے شہریوں اورمقیم غیر ملکیوں کو دی جانے والی ہدایات میں کہا گیا ہے کہ بخار ،مستقل کھانسی ،نزلہ زکام اور سینے میں در د کی عام شکایت پر بھی فوری طور پر ڈاکٹر سے رجوع کر کے مکمل طبی معائنہ کرایا جائے ۔ وائرس سے بچائوکے لیے ازدحام والے مقاما ت پر طبی ماسک کا استعمال ضرورکریں۔