امارات:کورونا کا کم عمر ترین مریض شفایاب

امارات میں کورونا کا کم عمر مریض شفایاب ہوگیا ہے۔ وہ کچھ دن قبل تک آئی سی یو میں تھا۔

الامارات الیوم کے مطابق خلیفہ میڈیکل سٹی میں زیر علاج 9 سالہ فلپائنی بچہ ہیرفی ایمانویل سب سے کم عمر مریض تھا۔

ہسپتال انتظامیہ نے کہا ہے کہ ’فلپائنی بچے کو  کوروٹا ٹیسٹ رپورٹ مثبت آنے پر 22 مارچ کو قرنطینہ مرکز منتقل کرنا پڑا‘۔

انتظامیہ نے کہا ہے کہ ’چند دن قبل تک اس کی حالت نازک تھی، اسے آئی سی یو میں رکھا گیا تھا تاہم اب وہ بالکل صحت مند ہے۔‘

انتظامیہ نے بتایا ہے کہ ’کورونا ٹیسٹ کا نتیجہ منفی آنے پر اسے گھر بھیج دیا گیا ہے، اس موقع پر طبی عملے نے اس خوشی میں جشن بھی منایا ہے‘۔

واضح رہے کہ کورونا سے شفایاب ہونے والا بچہ اپنے والدین کا اکلوتا ہے جو امارات میں مقیم ہیں۔