ڈھاکہ میں وبا سے بچنے کے لیے لوگوں کی سائیکل پر سواری

کورونا وائرس کی وبا پھیلنے سے پہلے بنگلہ دیش کے دارالحکومت ڈھاکہ میں رہنے والی 27 سالہ نسرین نیپا کے لیے کار پُول کر کے دفتر جانا کوئی مسئلہ نہیں تھا لیکن سماجی فاصلہ برقرار رکھنے کے لیے اب کار پر جانا ٹھیک نہیں تو انہوں نے اس کا حل نکال لیا ہے اور دفتر جانے کے لیے سائیکل کا استعمال شروع کر دیا ہے۔

نسرین، جو ڈھاکہ میں ایک اشتہاری کمپنی میں کام کرتی ہیں، نے عرب نیوز کو بتایا کہ ان کا دفتر گھر سے سات کلومیٹر کے فاصلے پر ہے ’میرا دفتر آنا جانا ایک مسئلہ بن گیا تھا کیونکہ وبا کی وجہ سے کار شیئرنگ ممکن نہیں تھی، اور پبلک ٹرانسپورٹ کو استعمال کرنا محفوظ نہیں تھا۔‘

نسرین اکیلی نہیں ہیں جو وبا سے بچنے کے لیے سائیکل کا استعمال کر رہی ہیں، بلکہ بہت سے لوگ اسے محفوظ سمجھ کر اپنا رہے ہیں۔

ایک فارماسوٹیکل کمپنی کے مینیجرعمران احمد کا کہنا تھا کہ ’ہمارے پاس دو آپشنز تھیں کہ میں موٹر سائیکل خریدوں یا سائیکل۔ میں نے سائیکل کا انتخاب کیا کیونکہ یہ ماحول دوست بھی اور سستی بھی ہے۔‘

انہوں نے کہا کہ ان کے دفتر کی طرف سے پک اینڈ ڈراپ کی سہولت دی گئی ہے لیکن انہوں نے سائیکل پر جانا اس لیے مناسب سمجھا کیونکہ اس سے ورزش بھی ہوتی ہے۔

اس رجحان سے سائیکل فروخت کرنے والوں کو بھی فائدہ ہو رہا ہے کیونکہ سائیکل کی خریداری بڑھ گئی ہے۔

سائیکلوں کی دکان کے مالک ہومان کبیر کا کہنا ہے کہ ’حالیہ ہفتوں میں سائیکل کی فروخت تین گنا بڑھی ہے۔‘

انہوں نے کہا کہ پہلے ان کے خریدار زیادہ تر نوجوان تھے لیکن اب 25 سے 60 برس کی عمر کے افراد بھی سائیکل خرید رہے ہیں۔

بنگلہ دیش سائیکلسٹ گروپ کے ایک رضاکار فواد احسن نے کہا کہ سائیکل پہلے غریب طبقے کی سواری سمجھی جاتی تھی لیکن اب رجحان بدل رہا ہے۔

انہوں نے کہا کہ ’سائیکل فروخت کرنے والوں کے لیے اس کی طلب کو پورا کرنا مشکل ہو رہا ہے کیونکہ وبا کی وجہ سے درآمد بھی متاثر ہوئی ہے۔‘

فواد احسن نے بتایا کہ اس ڈیمانڈ کو پورا کرنے کے لیے اتوار سے ڈھاکہ کے کچھ علاقوں میں نئی بائیک شیئرنگ سروس شروع ہوئی ہے، اور اب لوگ سائیکل کرائے پر بھی لے سکتے ہیں۔

ان کا کہنا تھا کہ ’مغربی ممالک میں بہت سے لوگ صحت کی بہتری اور ماحول کو صاف رکھنے کے لیے سائیکل کا استعمال کرتے ہیں۔ وبا کی وجہ سے ہمیں بھی موقع ملا ہے کہ ہم اس اچھی عادت کو اپنائیں۔‘