کورونا کے نئے مریض مسلسل 300 سے زیادہ

سعودی عرب میں کورونا کے نئے کیسز ایک ماہ سے مسلسل 300 سے زیادہ سامنے آرہے ہیں۔ 

سبق نیوز نے وزارت صحت کی جانب سے جاری بیان کے حوالے سے بتایا ہے کہ’ پیر کو گذشتہ 24 گھنٹے میں کورونا کے 314 نئے مریض سامنے آئے جبکہ 341 افراد وائرس سے صحت یاب بھی ہوئے ہیں۔‘

وزرات صحت کے مطابق ’گذشتہ 24 گھنٹے کے دوران کورونا کے مزید پانچ مریض چل بسے۔ جس کے بعد مرنے والوں کی تعداد 6 ہزار 438 ہو گئی ہے۔‘

وزارت صحت کا کہنا ہے کہ ’مملکت میں کورونا کے ایکٹیوکیسزکی تعداد دو ہزار 682 ہے، جن میں سے 472 کی حالت نازک ہے جو انتہائی نگہداشت کے یونٹس میں زیرعلاج ہیں۔‘

جاری اعداد و شمار کے مطابق سب سے زیادہ مریض ریاض ریجن میں سامنے آئے، جن کی تعداد 154 ہے جبکہ الشرقیہ ریجن میں 60 افراد میں وائرس کی تصدیق ہوئی ہے۔

 مکہ ریجن میں کورونا کے 47 مریض سامنے آئے جبکہ القصیم اور مدینہ منورہ ریجن میں 9،9 افراد میں کورونا وائرس کی تصدیق ہوئی ہے۔

الباحہ ریجن میں سات، الحدود الشمالیہ ریجن میں چھ ، حائل ریجن میں پانچ ، الجوف اور نجران ریجن میں چار، چار، عسیر، جازان اور تبوک ریجن میں تین، تین مریض سامنے آئے ہیں۔

اب تک تین لاکھ 73 ہزار 46 افراد میں کورونا وائرس کی تصدیق ہو چکی ہے جن میں سے تین لاکھ 63 ہزار 926 افراد شفایاب بھی ہوئے ہیں۔

وزارت صحت کا کہنا ہے کہ کورونا سے بچاؤ کے لیے مقررہ احتیاطی تدابیر پر عمل کرنا ضروری ہے، جن میں سماجی فاصلے کا اصول انتہائی اہم ہے۔