شاہ سلمان اور ولی عہد کا عراقی صدر سے اظہار تعزیت

خادم حرمین شریفین شاہ سلمان بن عبدالعزیز نے الناصریہ شہر میں الحسین ایجوکیشن ھسپتال میں آتشزدگی کے واقعے پر عراقی صدر برھم صالح سے تعزیت اور ہمدردی کا اظہار کیا ہے۔ 

سرکاری خبر رساں ایجنسی ایس پی اے  کے مطابق شاہ سلمان نے عراقی صدر کے نام اپنے پیغام میں کہا ہے کہ ہمیں الناصریہ شہر کے الحسین ایجوکیشن ھسپتال میں آتشزدگی کی خبر سے دکھ  ہوا، اس سے  ہونے والی اموات اور زخمیوں کی بابت سن کر ملال ہے۔ 

شاہ سلمان نے آتشزدگی سے ہلاک ہونے والوں کے اعزہ، عراقی صدر اور عوام سے گہرے رنج و ملال کا اظہار کیا اور دعا کی اللہ تعالی ان کے رشتے داروں کو صبر سے نوازے، زخمیوں کو فوری شفا عطا فرمائے اور عرافی عوام کو ہر آفت اور بلا سے اپنی پناہ میں رکھے۔

ولی عہد شہزادہ محمد بن سلمان نے بھی عراقی صدر کے نام تعزیتی پیغام بھیجا ہے اور انہوں نے ہلاک ہونے والوں کے رشتہ داروں، عراقی عوام اور صدر سے تعزیت کی ہے۔