حرمین ٹرین کے ذریعے عازمین کے قافلوں کی مکہ آمد

سعودی عرب میں ٹرانسپورٹ کمیٹی کا کہنا ہے کہ جدہ اور مدینہ منورہ سے حرمین ٹرین کے ذریعے عازمین کے قافلوں کی مکہ مکرمہ آمد کا آغاز ہو گیا ہے۔

قبل ازیں دیگر شہروں سے جمعہ کے روز فضائی راستوں سے عازمین حج کی آمد کا سلسلہ شروع کیا گیا تھا۔ 

سعودی خبررساں ایجنسی ’ایس پی اے ‘ کے مطابق ٹرانسپورٹ کی جنرل کمیٹی کا کہنا ہے کہ حرمین ٹرین کے ذریعے 187 عازمین کا پہلا قافلہ مکہ مکرمہ میں ’الرصیفہ ‘ ریلوے سٹیشن پرپہنچا جنہیں مخصوص بسوں کے ذریعے مسجد الحرام میں پہنچایا گیا۔ 

ٹرانسپورٹ کمیٹی کا کہنا ہے کہ عازمین کو مسجد الحرام لانے کےلیے تمام مقررہ احتیاطی تدابیر پرعمل کیاجارہا ہے۔

ٹرانسپوٹیشن کےلیے فراہم کی جانے والی بسوں کو بھی مکمل سینیٹائز کیا جاتا ہے تاکہ عازمین کوکسی قسم کی دشواری کا سامنا نہ کرنا پڑے اور وہ محفوظ طریقے سے فریضہ حج ادا کریں۔ 

واضح رہے اس سال 60 ہزار افراد فریضہ حج ادا کررہے ہیں جن میں سعودی شہری اور مقیم غیر ملکی دونوں شامل ہیں ۔ عازمین حج کو مختلف اسٹیشنز سے مکہ مکرمہ منتقل کیا جارہا ہے۔ جدہ سے خصوصی بسیں اور ٹرین سروس کی سہولتیں فراہم کی گئی ہیں۔ 

علاوہ ازیں مملکت کے مختلف شہروں سے  سنیچر کی صبح عازمین حج کی بڑی تعداد جدہ ایئرپورٹ پہنچی ہے جنہیں مکہ مکرمہ لے جایا گیا۔

مختلف شہروں سے آنے والے عازمین کا جدہ ایئرپورٹ کے ٹرمینل ون پر خیر مقدم کیا جا رہاہے۔