خادم حرمین شریفین شاہ سلمان بن عبدالعزیز کی خصوصی دعوت پر پاکستان سے 30 عازمین، حج کے لیے سعودی عرب روانہ ہوں گے۔
پاکستان میں سعودی عرب کے سفیر نواف بن سعید المالکی نے منگل کو ایک خصوصی تقریب میں ان عازمین کو تحائف دیے اور سفری دستاویزات اُن کے حوالے کیں۔
اردو نیوز سے گفتگو کرتے ہوئے نواف بن سعید المالکی نے کہا کہ ’خادم حرمین شریفین شاہ سلمان بن عبدالعزیز نے مسلمان ممالک سے ایک ہزار افراد کو حج کے لیے مدعو کیا ہے جن میں 30 پاکستانی بھی شامل ہیں۔‘
انہوں نے مزید بتایا کہ ’شاہ سلمان بن عبدالعزیز کی دعوت پر رواں برس ایک ہزار فلسطینی بھی حج کی سعادت حاصل کریں گے۔‘
