سعودی پروجیکٹ: یمن سے ایک ہفتے میں ایک ہزار 139 بارودی سرنگیں تلف

سعودی عرب کے مسام پروجیکٹ نے گزشتہ ہفتے کے دوران یمن کے مختلف علاقوں میں مزید ایک ہزار 139بارودی سرنگوں کو تلف کیا ہے۔

عرب نیوز کے مطابق مجموعی طور پر ایک اینٹی پرسنل بارودی سرنگ، ایک ہزار 80 بغیر دھماکے کی ڈیوائسز،56 اینٹی ٹینک بارودی سرنگیں اور دو دیسی ساختہ ڈیوائسز کو تباہ کیا گیا۔

مسام پروجیکٹ کے منیجنگ ڈائریکٹر اسامہ القصبی نے بتا یا ’ 2018 میں پروجیکٹ کے آغاز سے اب تک یمن میں حوثیوں کی بچھائی گئی چارلاکھ 98 ہزار 683 بارودی سرنگوں کو تباہ کیا جا چکا ہے۔‘

مارب، عدن، الجوف، لحج، صنعا، صعدہ، البیضا، الضالع، شبوہ، تعز، الحدیدہ اور دیگر علاقوں میں بارودی سرنگیں صاف کی گئیں۔

حوثیوں کی جانب سے نصب کی جانے والی بارودی سرنگوں سے بچوں، خواتین اور معمرافراد سمیت معصوم شہریوں کی زندگیوں کو شدید خطرہ لاحق ہے۔ 

یہ پروجیکٹ مقامی انجینیئرز کی بھی تربیت اورانہیں جدید آلات فراہم کرتا ہے جبکہ باردودی سرنگوں کی زد میں آنے والے یمنی شہریوں کی بھی مدد کی جاتی ہے۔

 پروجیکٹ کا مقصد یمن کے مختلف شہری اور دیہی علاقوں، سڑکوں اور سکولوں کو بارودی سرنگوں سے صاف کرنا ہے تاکہ معصوم شہریوں کی محفوظ آمد ورفت اور انسانی امداد کی فراہمی کو آسان بنایا جا سکے۔

واضح رہے حوثی باغیوں کی جانب سے 1.2 ملین سے زیادہ بارودی سرنگیں بچھائی گئی ہیں جس کے باعث سیکڑوں معصوم شہریوں کے زخمی اور ہلاک ہونے کے واقعات رونما ہوئے ہیں۔

 یمن میں بحران کے آغاز سے اب تک تقریبا 50 لاکھ افراد نقل مکانی پر مجبور ہوئے جن میں بیشتر بارودی سرنگوں کے باعث بے گھر ہوئے۔