وزیراعظم شہباز شریف سے پاکستان میں تعینات سعودی سفیر نواف بن سعید المالکی کی ملاقات

پاکستان کے وزیراعظم شہباز شریف سے پاکستان میں تعینات سعودی عرب کے سفیر نواف بن سعید المالکی نے سنیچر کو وزیراعظم ہاؤس میں ملاقات کی ہے۔

پرائم منسٹر آفس سے جاری کیے گئے بیان کے مطابق سعودی سفیر نے وزیراعظم کو 27 تا 30 اکتوبر 2025 ریاض میں منعقد ہونے والے نویں فیوچر انویسٹمنٹ انیشی ایٹو فورم میں شرکت کے لیے ولی عہد شہزادہ محمد بن سلمان بن عبدالعزیز آل سعود کی جانب سے دستخط شدہ دعوت نامہ پیش کیا۔

وزیراعظم شہباز شریف نے کانفرنس میں شرکت کی دعوت قبول کرتے ہوئے دعوت نامہ بھیجنے پر ولی عہد شہزادہ محمد بن سلمان کا شکریہ ادا کیا۔

بیان میں کہا گیا ہے کہ ’وزیراعظم نے خادم حرمین شریفین شاہ سلمان بن عبدالعزیز آل سعود اور ولی عہد شہزادہ محمد بن سلمان کے لیے نیک خواہشات کا اظہار کیا۔‘

دونوں رہنماؤں کی ملاقات کے دوران خطے کی حالیہ پیش رفت پر بھی تبادلہ خیال کیا گیا۔

ملاقات میں پاکستان کے نائب وزیراعظم اور وزیر خارجہ اسحاق ڈار اور وزیراعظم کے مشیر طارق فاطمی اور ڈاکٹر توقیر شاہ بھی موجود تھے۔