سعودی فلائی اے ڈیل کی پشاور اور اسلام آباد کے لیے ہفتہ وار پروازوں کا افتتاح

سعودی ایئر لائن فلائی اے ڈیل نے پاکستان کے لیے اپنی باقاعدہ پروازوں میں اضافہ کرتے ہوئے پشاور اور اسلام آباد کے لیے بھی پروازوں کا آغاز کر دیا ہے۔

پاکستان ایئرپورٹس اتھارٹی کے پیر کو جاری کردہ بیان کے مطابق ’باچا خان انٹرنیشنل ایئرپورٹ پشاور پر 25 اگست کو فلائی اے ڈیل کی افتتاحی پرواز کا خیرمقدم کیا گیا۔‘

بیان کے مطابق ’اس موقعے پر مینزیس آر اے ایس کی جانب سے انٹرنیشنل ڈیپارچر لاؤنج میں سی آئی پی لاؤنج کے سامنے کیک کاٹنے کی تقریب کا اہتمام کیا گیا۔‘

تقریب میں پاکستان ایئرپورٹس اتھارٹی، ایئرپورٹ سکیورٹی فورس اور مینزیس آر اے ایس کے حکام نے شرکت کی۔

فلائی اے ڈیل اب ہر ہفتے پیر اور بدھ کو ریاض سے پشاور کے لیے دو پروازیں چلائے گی۔

اس سے قبل گزشتہ روز فلائی اے ڈیل کی افتتاحی پرواز FAD 651/652 اسلام آباد انٹرنیشنل ایئرپورٹ پر اتری۔ یہ پرواز ریاض سے صبح 06 بج کر آٹھ منٹ پر 65 مسافروں کے ساتھ اسلام آباد ساتھ پہنچی اور اسے روایتی واٹر سیلوٹ پیش کیا گیا۔

بعدازاں یہ 172 مسافروں کے ساتھ ساڑھے سات بجے شام واپس روانہ ہوئی۔

بیان کے مطابق ’فلائی اے ڈیل اب ہر اتوار کو ریاض اور اسلام آباد کے درمیان پرواز چلائے گی۔

پاکستان ایئرپورٹس اتھارٹی نے فلائی اے ڈیل کے آغاز کو خوش آئند قرار دیتے ہوئے کہا کہ پشاور اور اسلام آباد کے لیے ان پروازوں سے فضائی روابط مزید مضبوط ہوں گے، مسافروں کو سہولت ملے گی اور پاکستان و سعودی عرب کے تعلقات کو فروغ حاصل ہو گا۔