میڈیکل کے 4 شعبوں میں سعودائزیشن کے دوسرے مرحلہ کا آغاز

وزارتِ افرادی قوت و سماجی بہبود آبادی کا کہنا ہے کہ وزارت صحت کے تعاون سے نجی طبی اداروں میں 4 پیشوں میں سعودائزیشن کے دوسرے مرحلہ کا آغاز 17 اکتوبر سے کردیا گیا ہے۔

سعودی خبررساں ایجنسی ’ایس پی اے‘ کےمطابق وزارتِ افرادی قوت وسماجی بہبود آبادی کی جانب سے مملکت کے پرائیوٹ سیکٹر میں سعودی مرد وخواتین کو زیادہ سے زیادہ روزگار کے مواقع فراہم کرنے کے لیے ’سعودائزیشن‘ مہم پر سختی سے عمل درآمد جاری ہے۔

وزارت نے مملکت کے تمام ریجنز میں قائم ہسپتال و طبی مراکز کو ہدایت کی تھی کہ وہ مختلف شعبوں میں سعودی کارکنوں کو تعینات کریں ۔

سعودائزیشن پرعمل درآمد کرنے کے لیے وزارت نے مختلف مراحل کا تعین کیا تھا۔ طبی اداروں میں کارکنوں کی گنجائش کو دیکھتے ہوئے سعودائزیشن کا تناسب مقرر کیا گیا۔

امور صحت کے نجی شعبے میں سعودائزیشن کے دوسرے مرحلہ کے لیے ڈیڈ لائن 17 اکتوبر 2025 دی گئی تھی۔ دوسرے مرحلہ میں 4 پیشہ شامل ہیں ۔

وزارت کی جانب سے مقرر کردہ تناسب کے مطابق ’نیوٹریشن‘ اور ’فزیوتھراپی‘ کے شعبے میں سعودی کارکنوں کی تعداد 80 فیصد مقرر کی گئی ہے جبکہ میڈیکل لیبارٹریز میں 70 فیصد اور ریڈیولوجی میں سعودی کارکنوں کا تناسب 65 فیصد مقرر کیا گیا ہے۔

طبی اداروں میں سعودی کارکنوں کی کم از کم ماہانہ اجرت کا تعین بھی کیا گیا ہے ۔ اسپیشلسٹ کو 7 ہزار ریال جبکہ ٹیکنیشن کے لیے کم از کم ماہانہ تنخواہ 5 ہزار ریال مقرر کی گئی ہے۔

وزارتِ افرادی قوت و سماجی بہبود آبادی کا مزید کہنا ہے کہ دوسرے مرحلہ کی ڈیڈ لائن ختم ہونے کے بعد وزارت کی تفتیشی ٹیمیں ضوابط پرعمل درآمد کو یقینی بنانے کے لیے تفتیشی مہم شروع کریں گی۔