پاکستان کا ایک ہزارواں ون ڈے میچ: بابر اعظم کی ٹیم میں واپسی، عرفاف منہاس کا ڈیبیو

پاکستان اور آسٹریلیا کے مابین تین ایک روزہ بین الاقوامی میچز کی سیریز کا پہلا میچ آج راولپنڈی میں کھیلا جا رہا ہے۔ 

سنیچر کو راولپنڈی کے پنڈی کرکٹ سٹیڈیم میں کھیلے جا رہے میچ میں پاکستان نے ٹاس جیت کر مہمان ٹیم کو پہلے بیٹنگ کی دعوت دی ہے۔ 

پاکستان کی جانب سے بابر اعظم کی ٹیم میں واپسی ہوئی ہے جب کہ عرفات منہاس آج اپنے ون ڈے کیریئر کا آغاز (ڈیبیو) کر رہے ہیں۔  

پلیئنگ الیون کے دیگر کھلاڑیوں میں صاحبزادہ فرحان،  معاذ صداقت، غازی غوری (وکٹ کیپر)، سلمان علی آغا، عبدالصمد، شاداب خان، شاہین شاہ آفریدی (کپتان)، حارث رؤف اور ابرار احمد شامل ہیں۔ 

آسٹریلیا کی ٹیم میں میٹ شارٹ،الیکس کیری، جوش انگلس (کپتان اور وکٹ کیپر)، مارنس لبوشین، کیمرون گرین، میٹ رینشا، اولی پیک،نیتھن ایلس، تنویر سنگھا، بلی اسٹین لیک اور میٹ کوہنیمن شامل ہیں۔ 

تین میچز کی سیریز کے اگلے دو میچز لاہور میں دو اور چار جون کو کھیلے جائیں گے۔ 

پاکستان کا ایک ہزارواں ایک روزہ بین الاقوامی میچ 

پاکستان کرکٹ ٹیم پنڈی کرکٹ سٹیڈیم میں آسٹریلیا کے خلاف اپنا ہزارواں ایک روزہ بین الاقوامی (ون ڈے) میچ کھیل رہی ہے۔ اس تاریخی سنگ میل کے ساتھ پاکستان 1000 ون ڈے میچز کھیلنے والی دنیا کی تیسری ٹیم بن گئی ہے۔

اس یادگار موقع پر آسٹریلوی کپتان جوش انگلس نے پاکستانی کپتان شاہین شاہ آفریدی کو سوونئیر پیش کیا۔ اس موقع پر شاہین شاہ آفریدی کا کہنا تھا کہ تاریخی میچ میں پاکستان کی نمائندگی کرنا ان کے لیے باعث فخر ہے۔

پنڈی کرکٹ سٹیڈیم اس تاریخی مقابلے کی میزبانی کر رہا ہے جسے پاکستان کرکٹ کی تاریخ میں ایک اہم سنگ میل قرار دیا جا رہا ہے۔