آسٹریلیا کے خلاف ڈیبیو میچ میں پانچ وکٹیں حاصل کرنے والے عرفات منہاس کون ہیں؟

آسٹریلیا کے خلاف اپنے پہلے ہی ون ڈے انٹرنیشنل میچ میں پانچ وکٹیں حاصل کرکے عرفات منہاس نے ون ڈے کرکٹ میں نہ کہ صرف اپنی آمد کا بھرپور اعلان کر دیا ہے بلکہ ون ڈے کے ڈیبیو میچ میں پانچ وکٹیں حاصل کرنے والے پہلے پاکستانی کھلاڑی بن گئے ہیں۔

سنیچر کو پنڈی کرکٹ سٹیڈیم میں انہوں نے اپنے ڈیبیو میچ میں 10 اوورز میں 32 رنز کے عوض پانچ وکٹیں حاصل کیں۔

صرف 21 برس کی عمر میں پاکستان ٹیم میں جگہ بنانے والے بائیں ہاتھ کے سپنر اور آل راؤنڈر نے آسٹریلیا کے خلاف شاندار بولنگ کا مظاہرہ کرتے ہوئے ثابت کیا کہ وہ پاکستان کرکٹ کے مستقبل کے اہم کھلاڑیوں میں شامل ہو سکتے ہیں۔

عرفات منہاس ان نوجوان کرکٹرز میں شامل ہیں جنہوں نے عمر کے مختلف درجوں کی کرکٹ میں مسلسل اچھی کارکردگی دکھانے کے بعد قومی ٹیم تک رسائی حاصل کی اور اب بین الاقوامی سطح پر بھی اپنی صلاحیتوں کا لوہا منوانا شروع کر دیا ہے۔

ابتدائی کیریئر

عرفات منہاس پاکستان کے صوبہ پنجاب کے شہر ملتان سے تعلق رکھنے والے ایک قبیلے منہاس راجپوت کے ایک خاندان میں پیدا ہوئے۔ ان کے والد کا نام کاشف منہاس ہے جو خود انڈر 19 کرکٹر رہ چکے ہیں۔

عرفات اپنے والد کو اپنا رول ماڈل سمجھتے ہیں جبکہ وہ عالمی سطح پر سابق جنوبی افریقی سٹار اے بی ڈی ویلیئرز سے بھی بے حد متاثر ہیں۔

انہوں نے صرف نو برس کی عمر میں ریڈ بال کلب کرکٹ کھیلنا شروع کی۔ بعد ازاں وہ انڈر 13 اور انڈر 16 سطح کی کرکٹ میں بھی مسلسل نمایاں رہے۔ انڈر 19 سطح پر نیشنل انڈر 19 چیمپئن شپ 2022 میں انہیں ٹورنامنٹ کا بہترین کھلاڑی قرار دیا گیا۔

یوتھ کیریئر

عرفات منہاس نے پاکستان انڈر 19 ٹیم کی نمائندگی کی۔

15 مئی 2023 کو بنگلہ دیش کے دورے کے دوران پانچویں اور آخری ون ڈے میچ میں انہوں نے شاندار آل راؤنڈ کارکردگی دکھائی۔ پہلے انہوں نے 42 گیندوں پر 40 رنز بنائے، اور بعد میں 7.3 اوورز میں 20 رنز دے کر تین وکٹیں حاصل کیں، جس میں ایک میڈن اوور بھی شامل تھا۔ اس کے علاوہ وہ ایک اہم رن آؤٹ میں بھی شامل رہے۔

24 اکتوبر 2023 کو کراچی میں سری لنکا انڈر 19 کے خلاف دوسرے یوتھ ون ڈے میں انہوں نے 66 گیندوں پر 95 رنز کی شاندار اننگز کھیلی اور پلیئر آف دی میچ قرار پائے۔ بولنگ میں انہوں نے صرف 21 رنز دیے اور 10 اوور مکمل کیے۔

دسمبر 2023 میں انہیں ایشیائی کرکٹ کونسل انڈر 19 ایشیا کپ کے لیے پاکستان ٹیم میں شامل کیا گیا اور نائب کپتان مقرر کیا گیا۔

اس کے بعد وہ 2024 انٹرنیشنل کرکٹ کونسل انڈر 19 ورلڈ کپ کا حصہ بنے۔ 27 جنوری 2024 کو نیوزی لینڈ انڈر 19 کے خلاف انہوں نے پانچ اوورز میں صرف چھ رنز دے کر تین وکٹیں حاصل کیں۔

8 فروری 2024 کو آسٹریلیا انڈر 19 کے خلاف سیمی فائنل میں انہوں نے 52 رنز بنائے اور بعد میں 10 اوورز میں 20 رنز دے کر دو وکٹیں حاصل کیں۔ پاکستان یہ میچ ایک وکٹ سے ہار گیا۔

پورے ٹورنامنٹ میں انہوں نے 8 وکٹیں حاصل کیں اور 105 رنز سکور کیے۔

ڈومیسٹک کیریئر

عرفات منہاس نے سنہ 2022 پاکستان جونیئر لیگ میں گوادر شارکس کی کپتانی کی اور بہترین کارکردگی پر انہیں ٹیم آف دی ٹورنامنٹ کا کپتان بنایا گیا۔

انہوں نے 10 دسمبر 2022 کو سندھ کے خلاف پاکستان کپ میں سدرن پنجاب کی جانب سے لسٹ اے کرکٹ میں ڈیبیو کیا۔

پاکستان سپر لیگ کے 2023 ڈرافٹ میں انہیں ملتان سلطانز نے سپلیمنٹری کیٹیگری میں منتخب کیا جبکہ 2024 ڈرافٹ میں کراچی کنگز نے انہیں سلور کیٹیگری میں سائن کیا۔

انٹرنیشنل کیریئر

دسمبر 2022 میں انہیں ان تین نوجوان کھلاڑیوں میں شامل کیا گیا جنہیں پاکستان کے ٹیسٹ سکواڈ کے ساتھ منسلک کیا گیا، ان میں محمد ذیشان اور باسط علی بھی شامل تھے۔

اگست 2023 میں وہ پاکستان کے سکواڈ میں شامل ہوئے جو 2022 ایشین گیمز میں شریک ہوا۔ تین اکتوبر 2023 کو ہانگ کانگ کے خلاف انہوں نے اپنا ٹی20 انٹرنیشنل ڈیبیو کیا۔ اس میچ میں انہوں نے 16 گیندوں پر 25 رنز بنائے اور 19 رنز کے عوض دو وکٹیں حاصل کیں۔

19 اکتوبر 2024 کو پاکستان شاہینز کی جانب سے انڈیا اے کے خلاف ایشیائی کرکٹ کونسل ایمرجنگ ٹیمز ایشیا کپ میں انہوں نے 29 گیندوں پر 41 رنز کی تیز اننگز کھیلی، تاہم ایک متنازع امپائرنگ فیصلے کے بعد آؤٹ ہوئے اور پاکستان یہ میچ سات رنز سے ہار گیا۔

پانچ دسمبر 2024 کو زمبابوے کے خلاف تیسرے ٹی20 میں انہوں نے 22 رنز بنائے اور چار اوورز میں 17 رنز دے کر بولنگ کی۔ اس میچ میں وہ پاکستان کے بولرز میں سب سے کم اکانومی ریٹ (4.25) کے ساتھ نمایاں رہے، جبکہ پاکستان یہ میچ دو وکٹوں سے ہار گیا۔