محمد یوسف بابراعظم کو ڈراپ کرنے پر حیران، ’بے معنی فیصلے کون کر رہا ہے؟‘

پاکستان کے سابق کپتان محمد یوسف نے قومی سکواڈ سے بابر اعظم کی غیر موجودگی پر ناپسندیدگی کا اظہار کیا ہے جس کو بنگلہ دیش کے خلاف آئندہ ون ڈے سیریز کے لیے تیار کیا گیا ہے.

پاکستان کرکٹ بورڈ (پی سی بی) نے بدھ کو 15 رکنی سکواڈ کا اعلان کیا تھا، جو 11 سے 15 مارچ تک شیر بنگلہ نیشنل سٹیڈیم ڈھاکہ میں تین ون ڈے میچ کھیلے گا۔

بابر اعظم کے علاوہ مزید ایسے پانچ کھلاڑیوں کو بھی سکواڈ کا حصہ نہیں بنایا گیا ہے۔

ان کی جگہ نئے چھ کھلاڑی شامل کیے گئے ہیں جن  میں عبدالصمد، معاذ صداقت، محمد غازی غوری، سعد مسعود، صاحبزادہ فرحان اور شامل حسین شامل ہیں۔

یہ فیصلہ ایک ایسے وقت سامنے آیا جب پاکستان حال ہی میں آئی سی سی مینز ٹی 20 ورلڈ کپ میں سیمی فائنل کے لیے کوالیفائی کرنے میں ناکام رہا تھا اور ٹیم کو اپنا آخری سپر ایٹ میچ 28 فروری کو سری لنکا کے خلاف 65 رنز کے مارجن سے جیتنے میں ناکامی ہوئی تھی۔ 

اگرچہ بابر اعظم اس میگا ایونٹ میں متاثر کن رنز بنانے میں ناکام رہے اور چھ اننگز میں محض 91 رنز بنا کر 22.75 کی مایوس کن اوسط حاصل کی، لیکن ان کی حالیہ فارم لمبے فارمیٹ میں حوصلہ افزا رہی۔ 

انہوں نے پاکستان کی حالیہ ون ڈے سیریز میں 165 رنز بنائے جو ان کی ون ڈے کرکٹ میں 20 ویں سینچری کے باعث خوش آئند تھی۔

اب سابق کپتان محمد یوسف نے ڈراپ کرنے کے فیصلے کو سمجھ سے باہر قرار دیا ہے۔

انہوں نے ایکس پر ایک پوسٹ میں لکھا کہ ’بابر اعظم کی شمولیت ٹی 20 ورلڈ کپ میں حیران کن تھی لیکن ان کا اب ڈراپ ہونا صرف آرام کے لیے نہیں ہے تو سمجھ سے باہر ہے کہ ایسے بے معنی فیصلے کون کر رہا ہے۔‘

واضح رہے پاکستان کے 15 رکنی ون ڈے سکواڈ  میں شاہین شاہ آفریدی (کپتان)، عبدالصمد، ابرار احمد، فہیم اصغر، فیصل اکرم، حارث رؤف، حسین طلحہ، معاذ صداقت، محمد رضوان (وکٹ کیپر)، محمد وسیم جونیئر، محمد غازی غوری (وکٹ کیپر)، سعد مسعود، صاحبزادہ فرحان، سلمان علی آغا اور شامل حسین شامل ہیں۔