داعش کی حمایت اور دہشت گرد کو 5 لاکھ ریال عطیہ دینے پر سعودی کو 20 برس قید

 ریاض..... سعودی فوجداری کی عدالت نے دہشت گرد تنظیم داعش کی حمایت ، ملکی نظام کو نقصان پہنچانے والا ابلاغی مواد تیار کرنے ، منحرف افکار پھیلانے والے ای گروپ میں شمولیت اور دہشت گرد کو 5 لاکھ ریال عطیہ دینے پر ایک سعودی شہری کو 20 برس قید کی سزا سنا دی۔ تفصیلات کے مطابق دہشت گردی میں ملوث سعودی شہری دہشت گردوں سے رابطے استوار کئے ہوئے تھا۔ انہیں چھپنے چھپانے کی سہولت مہیا کرتا تھا ۔ متعدد افراد کو سعودی عرب سے شورش زدہ مقامات جانے میں تعاون فراہم کررہا تھا۔ سرکاری اداروں کی حراست سے نکالنے کیلئے مختلف تدبیریں اختیار کررہاتھا۔ اقرار نامے پر رہائی حاصل کرکے دوبارہ فکری انحراف کا حصہ بن گیا تھا۔ عدالت نے اسے مجموعی طور پر 20 برس قید کی سزا سنائی۔ آئندہ اسے انٹرنیٹ سے منسلک ہونے پر پابندی لگا دی گئی۔ اس کی موبائل سم منسوخ کردی گئی اسے قید کی میعاد 20 برس مکمل کرنے کے بعد اتنی ہی مدت تک مملکت سے باہر جانے پر پابندی لگا دی گئی۔