ریاض.... تیسری صدی ہجری میں لکھا گیا قرآن کریم کا قلمی نسخہ ریاض میں منعقد ہونے والے کتب میلے میں لوگوںکی توجہ کا مرکز بنا ہوا ہے ۔ سبق نیوز کے مطابق قرآن کریم کے اس قلمی نسخے کو شیشے کے خوبصورت بکس میں رکھا گیا ہے تاکہ لوگ ہاتھ نہ لگائیں اور قدیم قلمی نسخہ محفوظ رہے ۔ قرآن کریم کا یہ نسخہ 11 سو برس قدیم ہے ۔ قلمی قرآنی نسخے کا آغاز سورة آل عمران کی 50 ویں آیت سے ہوتا ہے جبکہ سورة عبس پر ختم ہو تا ہے ۔ قدیم ترین نسخے میں مختلف رنگوں کا استعمال کیا گیا ہے جس میں اعراب کےلئے جدا جدا رنگ استعمال کئے گئے ہیں ۔ تشدید کی علامت کےلئے ہرا رنگ استعمال ہوا ہے ۔ ہمزہ کو پیلے رنگ سے لکھا گیا ہے جبکہ آیات کی تحریر سیاہی سے کی گئی ہے ۔ کتب میلے میں آنے والے اکثر زائرین اس قدیم نسخے میں خصوصی دلچسپی لے رہے ہیں ۔ ہر شخص قدیم نسخے کی تصاویر بڑے شوق سے بناتاہوا دکھائی دے رہاہے ۔ لوگوں کا کہنا تھا کہ ا س قسم کے قدیم نسخے کو کتب میلے میں رکھنا انتظامیہ کا بہترین اقدام ہے ۔
