ایشین گیمز: پاکستان فٹبال ٹیم کی دوسری شکست

  جکارتہ: ایشین گیمز مینز کے فٹ بال ایونٹ میں پاکستانی ٹیم کو جاپان کے ہاتھوں ایونٹ میں مسلسل دوسری شکست کا سامنا کرنا پڑا۔ گروپ کی ٹاپ ٹیم نے 0-4سے کامیابی سمیٹی۔ جاپانی کھلاڑیوں نے میچ کے آغاز سے ہی جارحانہ کھیل پیش کیا اور تابڑ توڑ حملے کیے، دوسرے ہی منٹ میں یوٹو ایواساکی نے بال کو جال میں پھینکتے ہوئے ٹیم کو برتری دلا دی، 9ویں منٹ میں ریو ہٹاٹے نے گول کرتے ہوئے ٹیم کی برتری دوگنا کر دی۔ایک منٹ بعد ڈیزن مائیڈا نے اسکور0-4 کر دیا۔ 35ویں منٹ میں یوٹو ایواساکی نے انفرادی طور پر دوسرا گول کرتے ہوئے ٹیم کی جانب سے آخری گول ا سکور کیا۔ پاکستانی پلیئرز کوشش کے باوجود کوئی گول کرنے میں کامیاب نہ ہو سکے۔ جاپان نے میچ0-4سے اپنے نام کیا۔واضح رہے کہ ایونٹ کے ابتدائی میچ میں گرین شرٹس کو ویتنام کے ہاتھوں یکطرفہ مقابلے میں0-3 سے شکست کا سامنا کرنا پڑا تھا۔