انٹرنیشنل فالکنز اینڈ ہنٹنگ فیسٹیول کے فور وہیلر تجربے میں لوگوں کی دلچسپی

سعودی دارالحکومت ریاض کے شمالی علاقے میں جاری ’انٹرنیشنل فالکنز اینڈ ہنٹنگ ایگزیبشن 2026 ‘ میں مملکت کے مختلف سرکاری اداروں نے اپنے خصوصی پویلین قائم کیے ہیں۔

ایس پی اے کے مطابق امسال منعقد ہونے والی نمائش کا سلوگن ’سب کے لیے تجربہ‘ رکھا گیا ہے، نمائش 10 اکتوبر 2026 تک جاری رہے گی۔

باز و شکار میلے میں شہری دفاع کے پویلین میں وزیٹرز کو آگ بجھانے کے حوالے سے استعمال کی جانے والی جدید ترین ٹیکنالوجیز کے بارے میں معلومات فراہم کی جا رہی ہیں۔

وزارتِ داخلہ کے میڈیکل سروسز پویلین میں آنے والوں کو صحت آگاہی کی خدمات اور جدید آلات کے بارے میں آگاہ کیا جاتا ہے جبکہ وہاں موجود ایک فیلڈ  کلینک  میں خصوصی طور پر وزیٹرز کو سیزنل فلو ویکسین بھی لگانے کا اہتمام کیا گیا ہے۔

باز و شکار میلے میں وزیٹرز کی دلچسپی کے لیے خصوصی طور پر ایک علاقے میں غیر ہموار و ریتلے راستے بنائے گئے ہیں جہاں فور وہیلرز گاڑیوں کے ذریعے نہ ہموار ٹریک پر ڈرائیونگ کے تجربے سے روشناس کرایا جاتا ہے۔

فور وہیلر گاڑی کو اس مخصوص ٹریک پر چلانے کے منفرد تجربے سے گزرنے کے لیے وزیٹرز کو رجسٹریشن کرانا ہوتی ہے جس کے بعد ماہر ڈرائیور کے ساتھ ناہموار ٹریک پر ’ٹیسٹ ڈرائیو‘ کی جاتی ہے۔

نمائش میں ’فور وہیلر ڈرائیو‘ کا اہتمام موٹر سپورٹس ایونٹس کی قومی کمپنی کی جانب سے کیا گیا ہے۔ اس ضمن میں خصوصی ٹریک پر مختلف رکاوٹیں قائم کی گئی ہیں جن سے گاڑی گزرتی ہے۔ نمائش کے روز اول سے ہی فور وہیلر تجربہ وزیٹرز میں غیرمعمولی طور پر پسند کیا جا رہا ہے۔

باز و شکار نمائش میں وزارتِ داخلہ کے پویلین میں ادارہ امن عامہ، جوازات اور دیگر شعبوں کی جانب سے بھی شرکت کی گئی ہے جہاں وزیٹرز کو ان اداروں کے بارے میں آگاہی فراہم کی جاتی ہے۔