گورنر ہاوس لاہور کی دیواریں گرانے کا کام شروع

  لاہور...وزیراعظم عمران خان کی ہدایت پرگورنر ہاوس لاہور کی بیرونی دیواریں گرانے کا کام شروع ہوگیا۔ دیواریں مسمار کرکے ان کی جگہ جنگلا لگانے کا کام ایک ماہ میں مکمل ہوگا۔گورنر پنجاب چوہدری سرور نے کہا ہے کہ پی ٹی آئی کی حکومت نے اپنا ایک وعدہ پورا کردیا۔گورنر ہاوس کے نئے استعمال کے متعلق حتمی فیصلہ وزیراعظم کریں گے۔ انہوں نے کہا کہ ایک پلان اور حکمت عملی کے تحت گورنر ہاوس کی بیرونی دیواریں گرائی جائیں گی۔ دیوار کی جگہ حفاظتی جنگلہ لگایا جائے گا۔ عمارت گرانے کا تاثرغلط ہے۔ واضح رہے کہ گورنر ہاوس کو آرٹ گیلری، عجائب گھر اور بوٹینیکل گارڈن بنانے کی تجاویز سامنے آچکی ہیں۔دریں اثناء وفاقی وزیر تعلیم اور چیئرمین قومی ورثہ کمیشن شفقت محمود نے کہاہے کہ گورنر ہاوس کو آرٹ گیلری بنانے کا فیصلہ کیا گیا ہے۔ گورنر ہاوس کی بیرونی دیوار کی جگہ خوبصورت آہنی جنگلا لگایا جائے گا۔اس سے عمارت مزید پرکشش ہوجائے گی۔