اسلام آباد... وفاقی وزیر اطلاعات فواد چوہدری نے کہا ہے کہ پاک، ہندکشیدگی میں کمی آرہی ہے ۔ دنیا میں ہند کا مذاق اڑایا جارہا ہے ۔ دنیا میں پاکستان کا قد بڑھا ہے ۔اسلام آباد میں میڈیا سے بات کرتے ہوئے وزیر اطلاعات نے کہا کہ آج حالات بدل رہے ہیں ۔ہم گزرتے وقت کے ساتھ جنگ سے دور ہورہے ہیں ۔کشیدگی میں کمی کا کریڈٹ وزیراعظم اور فوجی قیادت کو جاتا ہے۔ دنیا میں پاکستان کا قد بڑھا ہے۔انہو ں نے کہا کہ ہند جنگی جنون میں مبتلا جبکہ پاکستان امن کا خواہاں ہے ۔ موجودہ صورت حال میں سیاستدانوں نے سنجیدگی کا مظاہرہ کیا ۔عوام بھی اس بحران میں جنگی جنون کا شکار نہیں ہوئے ۔ کشیدہ صورتحال میں تمام دوست ممالک نے ساتھ دیا ۔دوست ممالک اورامر یکہ نے پاکستان کے مو قف کی تائید کی ۔غیر ملکی میڈیا نے پاکستان کے بارے میں مثبت رپورٹنگ کی ۔ ہندوستانی میڈیا کا بری طرح سے مذاق اڑایا گیا ۔نریندر مودی سے ہند میں سوال اٹھ رہے ہیں کہ الیکشن مہم کے لئے ایسا کیوں کیا جارہا ہے۔انہو ں نے مزید کہا کہ ہمیں اپنی تجارت بڑھانی ہے ۔ملک کی معیشت کو اپنے پاوں پر کھڑا کرنا ہے ۔ ایف اے ٹی ایف کی پابندیوں کے حوالے سے بھی کام جاری ہے۔ نیشنل سیکیورٹی کمیٹی نے انتہا پسندی کے خلاف کارروائی کا فیصلہ کیا تھا ۔ پاکستان میں انتہا پسندی کے خلاف کارروائی کریں گے ۔ مرحلہ وار کام شروع ہوچکا ہے۔کالعدم تنظیموں کے خلاف کارروائیاں تیز کرنے سے متعلق فواد چوہدری نے کہا کہ تمام اقلیتوں کا احترام ضروری ہے ۔ جہاں ہندوستانی طیارہ گرایا گیا وہاں فیصل واوڈا کے وڈیو بنوانے سے قیامت نہیں آگئی۔
