سعودی ولی عہد شہزادہ محمد بن سلمان کی چیریٹی فاونڈیشن ’مسک‘ کے زیرانتظام سعودی عرب میں جاپان کے تعاون سے بچوں کے لیے سلسلہ وار اینیمیٹڈ فلمز کا آغاز کیا جا رہا ہے۔
عرب نیوز کے مطابق سعودی عرب کی مانجا پروڈکشنز نے جاپانی کارٹون ’انیمے‘ کے انداز میں پہلی سعودی اینیمیٹڈ سیریز تیار کی ہے جس میں ماضی کی لوک داستانیں خوبصورت انداز میں پیش کی جائیں گی۔
بچوں کے لیے یہ اینیمیٹڈ سیریز 24 جنوری سے ایم بی سی ون چینل پر سلسلہ وار دکھائی جائے گی۔ اس سیریز کا مقصد بالعموم پوری عرب دنیا جبکہ بالخصوص سعودی عرب کے عوام خصوصا بچوں کو تفریح کا ایک اور موقع نئے انداز میں فراہم کرنا ہے۔
سیریز میں کہانی دادی اماں اور ان کے پوتوں کے درمیان ہونے والے مکالموں پر مشتمل ہے جس میں بچوں کو ماضی کی سبق آموز داستانوں سے روشناس کرایا جائے گا۔ بچوں کو ان کہانیوں کے ذریعے سعودی عرب کی اخلاقی قدروں کے بارے میں سبق دیا جائے گا۔
جاپان کے قدیم اور مشہور سٹوڈیو ’توائی اینیمے‘ کے تعاون سے تیار کی جانے والی یہ سیریز سعودی عرب میں اپنی نوعیت کی پہلی فلم ہے۔
مانجا پروڈکشن کے چیف ایگزیکٹو ڈاکٹر عصام بخاری نے بتایا ہے کہ ’ہم سعودی عرب اور دیگر تمام عرب ممالک کے لیے ایسا تخلیقی کام اور مواد فراہم کرنا چاہتے ہیں جو سعودی عرب کی آئندہ نسلوں کے لیے تحقیق و جستجو اور علوم و فنون کو آگے بڑھانے کے لیے بنیاد ثابت ہو سکے۔
من السعودية في المستقبل...أجمل وأروع الحكايات ترويها الجدة أسماء من تراث بلادنا في العرض الأول والحصري لمسلسل أساطير #في_قادم_الزمان
تابعونا يوم الجمعة عصرًا 24 يناير على قناة@mbc1
نشوفكم على خير pic.twitter.com/Lac0TAvkq3— Manga Productions (@manga_prd) January 1, 2020
سعودی پریس ایجنسی ایس پی اے کے مطابق 13 اقساط پر مشتمل اس سیریز میں سعودی عرب اور دنیا کی قدیم ثقافت کو کہانیوں کی شکل میں اجاگر کرنے کی کوشش کی گئی ہے۔
قدیم زمانے میں یہاں کے لوگوں کی نقل و حمل، رہن سہن، طور طریقے اور سماجی روایات کی کارٹون کی شکل میں منفرد اور خوبصورت انداز میں عکاسی کی گئی ہے۔
یہ فلمی سیریز خاص طور پر بچوں کے لیے زیادہ دلچسپی کی حامل ہوگی کیونکہ اس میں جزیرہ العرب کی قدیم کہانیاں خوبصورت اور دلکش انداز میں پیش کی جا رہی ہیں۔
-
سعودی عرب کی خبروں کے لیے واٹس ایپ گروپ جوائن کریں
