سعودی کابینہ میں ردوبدل، نئے وزرا شامل

خادم حرمین شریفین شاہ سلمان بن عبد العزیز نے شاہی فرمان جاری کر کے متعدد فیصلے کیے ہیں۔

سعودی پریس ایجنسی کے مطابق منگل کو دارالحکومت ریاض سے جاری ہونے والے شاہی فرمان کے مطابق وزیر سول سروس سلیمان الحمدان اور سرمایہ کاری اتھارٹی کے سربراہ ابراہیم العمر کو سبکدوش کر دیا گیا ہے۔

خادم حرمین شریفین نے وزارت سول سروس کو وزارت محنت وسماجی فروغ میں ضم کرنے کا فیصلہ کیا ہے۔ دونوں وزارتوں کو ضم کرنے کے بعد نئی وزارت کا نام وزارت ہیومن ریسورسز و سماجی فروغ رکھا جائے گا۔

شاہی فرمان میں محکمہ سیاحت و قومی ورثے کو وزارت میں تبدیل کر دیا گیا ہے اور نئی وزارت کا نام وزارت سیاحت رکھا جائے گا۔

شاہ سلمان نے سپورٹس اتھارٹی کو وزارت میں تبدیل کرنے کا فیصلہ کیا ہے اور نئی وزارت کا نام وزارت سپورٹس رکھا جائے گا۔

شاہ سلمان نے شہزادہ عبد العزیز بن ترکی بن فیصل آل سعود کو وزیر سپورٹس مقرر کر دیا ہے۔

شاہی فرمان میں کہا گیا ہے کہ ماجد الحقیل کو وزارت بلدیات و دیہی امور کا قلم دان سونپا گیا ہے۔ وہ اپنے سابقہ فرائض کے ساتھ وزارت بلدیات کا کام بھی کریں گے۔

خادم حرمین شریفین نے وزیر اطلاعات ترکی الشبانہ کو سبکدوش کر کے ڈاکٹر ماجد القصبی کو وزارت کا قلم دان سونپ دیا ہے۔

شاہی فرمان کے مطابق محمد بن عبد اللہ العمیل کو کابینہ کے سیکرٹری جنرل کا نائب مقرر کر دیا گیا ہے۔

شاہ سلمان نے انجینئرخالد الفالح کو وزارت سرمایہ کاری جبکہ احمد الخطیب کو وزارت سیاحت کا قلم دان سونپا ہے۔