پاکستان کے وزیر اعظم نمائندہ خصوصی برائے مذہبی ہم آہنگی اور مشرق وسطیٰ حافظ طاہر اشرفی نے سعودی صحافی جمال خاشقجی کے قتل کے حوالے سے امریکی رپورٹ کے مندرجات کو بے بنیاد قرار دیتے ہوئے اس کی تردید کر دی۔
عرب نیوز کے مطابق طاہر اشرفی نے سنیچر کو لاہور میں ایک کنونشن سے خطاب کرتے ہوئے کہا کہ خاشقجی کے قتل کے حوالے سے سعودی حکومت نے انصاف کے تقاضے پورے کیے اور مملکت کی قیادت کے خلاف پروپیگنڈہ بے بنیاد ہے۔
مزید پڑھیں
-
عدالت نے ہمارے ساتھ انصاف کیا ہے،صلاح خاشقجیNode ID: 449696
-
سعودی عرب نے خاشقجی کے قتل سے متعلق امریکی رپورٹ مکمل مسترد کردیNode ID: 544621
-
خاشقجی رپورٹ: پاکستان اور عرب دنیا کی سعودی موقف کی حمایتNode ID: 544756
پاکستان علما کونسل کے چیئرمین طاہر اشرفی نے سعودی قیادت کے ساتھ اظہار یکجہتی کرتے ہوئے کہا کہ سعودی عرب اور پاکستان کے درمیان تعلقات مستقل اور مضبوط ہے اور کوئی چیز ان میں دراڑ نہیں ڈال سکتی۔
طاہر اشرفی نے کہا کہ سعودی ولی عہد محمد بن سلمان کے خلاف پہلے دن سے منفی پروپیگنڈہ کیا جارہا ہے حالانکہ انہوں نے سعودی عرب میں اعتدال پسند پالیسیوں کی بنیاد رکھ دی ہے۔
طاہر اشرفی کے مطابق ولی عہد کا وژن 2030 نہ صرف سعودی عرب بلکہ پورے عرب خطے کی ترقی کے لیے ہے۔
خیال رہے قبل ازیں پاکستان کے دفتر خارجہ نے سنیچر کو سعودی صحافی جمال خاشقجی کے قتل پر سعودی موقف کی حمایت کرتے ہوئے کہا تھا ’پاکستان اس ضمن میں سعودی کوششوں کا اعتراف کرتا ہے اور سعودی عرب کے ساتھ یک جہتی کا اظہار کرتا ہے۔‘
دفتر خارجہ کی جانب سے جاری بیان میں مزید کہا گیا تھا کہ پاکستان قانون کی حکمرانی کی پاسداری، قومی خودمختاری کے احترام پر زور دیتا ہے۔‘
پاکستانی دفتر خارجہ کے مطابق سعودی حکومت نے جمال خاشقجی کے قتل کو ’بہیمانہ جرم‘ اور ’سلطنت کے قوانین اور اقدار کی سنگین خلاف ورزی‘ قرار دیا ہے۔‘