’کیا اجلاس میں کورونا کا آنا منع ہے؟‘

پاکستان کے وزیراعظم عمران خان کا کورونا ٹیسٹ تاحال منفی نہیں آیا تاہم انہوں نے دفتری کام شروع کر دیا ہے جس پر سوشل میڈیا صارفین مایوسی اور افسوس کے ملے جلے ردعمل کا اظہار کر رہے ہیں۔

منگل کو وزیراعظم کے معاون خصوصی شہباز گِل نے ایک ٹویٹ کے ذریعے تصاویر شیئر کرتے ہوئے بتایا کہ ’وزیراعظم عمران خان نے معمول کا دفتری کام شروع کر دیا ہے۔ یہ گلگت بلتستان ڈویلپمنٹ پلان پر آج کا اجلاس ہے۔‘  

وزیراعظم کے اجلاس کی سربراہی کرنے کی خبر اور تصاویر سوشل میڈیا پر شیئر ہونے کے بعد کسی نے اس بات کو نامناسب قرار دیا تو بعض نے عالمی ماہرین کے کورونا کے حوالے سے پروٹوکولز کا تذکرہ کیا۔

کئی صارفین ایسے بھی تھے جنہوں نے لکھا کہ ’وزیراعظم سے زیادہ محتاط رہنے کی توقع ہوتی ہے‘ جبکہ ایک صارف نے اجلاس میں عمران خان کے لباس پر ہی تنقید کر دی۔

شہباز گِل کے مطابق ’بین الاقوامی طبی ماہرین کی گائیڈ لائنز کے مطابق جب کورونا کی علامات ختم ہو جائیں تو اس کے تین دن کے بعد قرنطینہ کی ضرورت ختم ہو جاتی ہے۔ کورونا کا منفی ٹیسٹ کروانا ضروری نہیں ہوتا‘۔ 

اس ٹویٹ پر تبصرہ کرنے والوں میں سے ایک ٹوئٹر ہینڈل نوفل نے لکھا کہ ’کورونا وائرس کی علامات ظاہر ہونے کے بعد کابینہ اجلاس کرنے کے بارے میں بین الاقوامی ماہرین کیا کہتے ہیں؟'

اجالا نوشین نے لکھا کہ ’وزیراعظم عمران خان کو ویلکم بیک کہتے ہیں۔‘

کورونا کے دوران ایس او پیز کا خیال رکھنے کے حوالے سے عتیق نامی  ٹوئٹر صارف نے لکھا کہ’ ڈاکٹر صاحب کیوں لوگوں کو الجھن میں ڈال رہے ہیں۔ آپ این ایچ ایس کی ویب سائٹ پر جائیں اور کورونا ایس او پیز دیکھیں۔ علامات ظاہر ہونے کے بعد کم از کم دس دن قرنطینہ ہونا ہوتا ہے۔ اگر دس دن بعد یہ علامات شدت اختیار نہیں کرتیں اور بخار نہیں ہوتا تو قرنطینہ سے باہر آسکتے ہیں اور دوبارہ ٹیسٹ کی ضرورت نہیں۔‘

توئٹر صارف عمران بٹ نے عمران خان کی تصاویر ریٹویٹ کر کے لکھا کہ ’کام کام کام، قائد کا فرمان۔‘

کامران نامی ٹوئٹر صارف نے شہباز گِل کی ٹویٹ پر تبصرہ کیا کہ ’کیا اس اجلاس میں کورونا کا آنا منع ہے؟ کیا کورونا غریبوں کے لیے ہے؟‘
ایک صارف نے وزیراعظم کے اجلاس میں پہنے لباس پر ناپسندیدگی کا اظہار کیا اور لکھا کہ 'ایسا لباس زیب تن کیا ہے جیسے کرکٹ کھیلنی ہو۔‘