’کیا مسلمان ترقی یافتہ ممالک میں محفوظ ہیں؟‘

کینیڈین شہر لندن میں پاکستانی نژاد خاندان کی ہلاکت کے واقعے پر سماجی رابطوں کی ویب سائٹس پر  ترقی یافتہ ممالک میں اسلام مخالف جذبات اور مسلمانوں کی سلامتی کے بارے میں بات کر رہے ہیں۔

 سماجی رابطے ٹوئٹر پر اس وقت #MuslimLivesMatter #Islamaphobia ٹرینڈنگ لسٹ میں سر فہرست ہیں۔

مجموعی طور پر سوشل میڈیا صارفین اس واقعے کی مکمل تحقیقات اور ٹرک ڈرائیور کو سزا دینے کا مطالبہ کر رہے ہیں۔

مسلم لیگ ن کی نائب صدر مریم نواز کا کہنا ہے کہ ’یہ نفرت پر مبنی دہشت گردی کا واقعہ ہے۔‘

انہوں نے واقعے میں زخمی ہونے والے بچے کے لیے ہمدردی کا اظہار بھی کیا۔  

ٹوئٹر صارف اسما خان نے لکھا کہ ’میری بھابی کی خالہ کی بیٹی کی فیملی کینیڈا میں اسلاموفوبیا کی شکار ہو گئی۔ صرف دس سال کا بچہ ہسپتال میں ہے۔ باقی سب انتقال کر گئے۔ پندرہ سال کی بیٹی بہت اچھی آرٹسٹ تھی۔

صارف خرم نواز گنڈاپور کا نے سماجی رابطے کی ویب سائٹ پر لکھا کہ ’کینیڈین حکومت کو اسلام فوبیا کو ختم کرنے کے لیے مزید تیزی سے کام کرنا ہوگا، کینیڈا میں رہنے والے مسلمان خاندانوں کی حفاظت کرنا کینیڈین حکومت کی ذمہ داری ہے.‘

خیال رہے کہ گذشتہ روز پیر کو کینیڈا کے صوبے اونٹاریو میں حکام کے مطابق ایک ٹرک ڈرائیور نے حکام کے مطابق ایک مسلم خاندان کے چار افراد کو ’سوچے سمجھے منصوبے‘ کے تحت ٹرک سے کچل کر ہلاک کر دیا تھا۔

ٹوئٹر صارف صفیہ عافقی نے سوال کیا ہے ’مسلمانوں کیا اب ابھی آپ کو لگتا ہے کہ آپ ترقی یافتہ ممالک میں محفوظ ہیں؟ نہیں بحیثیت مسلمان آپ نشانے پر ہیں‘۔

اس خاندان میں سے صرف نو سال کا ایک بچہ زندہ بچا ہے جو شدید زخمی حالت میں ہسپتال میں داخل ہے۔

پاکستانی ٹی وی اور فلم کی معروف اداکارہ ارمینا رانا خان نے ٹویٹ کی کہ ’یہ واقعہ مسلمانوں کے خلاف میڈیا کے مسلسل پروپیگینڈا کا نتیجہ ہے۔‘

پنجاب کے سینیئر وزیر عبدالعلیم خان نے ٹوئٹر بیان میں ’اسلاموفوبیا کو اس واقعے کی وجہ قرار دیتے ہوئے اسے دہشت گردی قرار دیا ہے۔‘