سعودی ویمنز فینسنگ ٹیم کے تربیتی کیمپ کا آغاز

سعودی عربین ویمنز فینسنگ ٹیم نے الراکہ میں شہزادہ سعود بن جلوی سپورٹس سٹی کے فینسنگ ہال میں تربیتی کیمپ کا آغاز کیا ہے۔

عرب نیوز نے سپورٹس جریدے الریاضیہ کے حوالے سے بتایا ہے کہ اس تربیتی کیمپ کا انعقاد دمام میں ہونے والے گولڈ راؤنڈ آف دی سعودی فینسنگ چیمپئن شپ سے پہلے کیا گیا ہے۔

ٹیم کے 30 ارکان مقابلے کی تیاری کر رہے ہیں جو 17 اور 18 ستمبر کو منعقد ہوں گے۔

تربیتی سیشن تکنیکی پہلوؤں کے ساتھ ساتھ جسمانی فٹنس کو بہتر بنانے کی مشقوں پر مرکوز رہا۔

مملکت میں فینسنگ کا کھیل تیزی سے مقبول ہو رہا ہے اور فیڈریشن نے اس بات کو یقینی بنایا ہے کہ کوورنا کی  وبا کے دوران سرگرمیوں میں کمی کے باوجود کھیل ترقی کی منازل طے کرتا رہے۔

سعودی عرب فینسنگ فیڈریشن کے صدر احمد الصبان نے مئی میں عرب نیوز کو بتایا تھا کہ ’ہم رکے نہیں،اس کے برعکس ہم بہت متحرک تھے۔ لاک ڈاؤن کے دوران ہم باقاعدہ سیزن میں بھی واپس آئے اور ہم نے ٹورنامنٹس کا اہتمام کیا اور ہمارے لیے آخری شرکت ایشین زون میں ٹوکیو اولمپکس کے لیے کوالیفیکیشن تھی۔‘

احمد الصبان نے ملک بھر میں خواتین کھلاڑیوں میں شرکت کے اضافے پر بھی روشنی ڈالی۔

انہوں نے کہا کہ ’ہم نے اس پر کام کیا ہے۔ یہ ایک عمدہ اور نفیس کھیل ہے جیسے گھڑ سواری کی سرگرمیاں۔یہ ایک منفردکھیل ہے اور اس میں شرکت بہت اچھی رہی ہے۔