سعودی سفیر کی سپیکر قومی اسمبلی اسد قیصر سے ملاقات

پاکستان میں سعودی عرب کے سفیر نواف بن سعید المالکی نے سپیکر قومی اسمبلی اسد قیصر سے ملاقات کی ہے۔

سعودی سفارتخانے کے سرکاری ٹوئٹر اکاؤنٹ پر ٹویٹ میں کہا ہے کہ ملاقات کے دوران دونوں برادر ممالک میں باہمی دلچسپی کے امور کو دیگر شعبوں میں مزید مضبوط بنانے پر تبادلہ خیال کیا گیا۔

سپیکر اسد قیصر نے کہا کہ پاکستان اور سعودی عرب کے مابین مضبوط برادرانہ تعلقات پائے جاتے ہیں جو مشترکہ عقیدے، ثقافت، روایات اور باہمی احترام کی مضبوط بنیادوں پر قائم ہیں۔

مسلم امہ کے رہنما کے طور پر سعودی عرب کے کردار کو سراہتے ہوئے سپیکر قومی اسمبلی نے کہا کہ 'سعودی عرب نے ہمیشہ خطے میں قیام امن کے لیے اپنا مثبت کردار ادا کیا ہے۔'

اسد قیصر نے افغانستان میں بڑھتے ہوئے انسانی بحران کا ذکر کرتے ہوئے کہا کہ افغانستان کی موجودہ صورتحال عالمی برادری کی فوری توجہ کی منتظر ہے۔

ان کا کہنا تھا کہ 'اس سلسلے میں سعودی عرب کا کردار انتہائی اہمیت کا حامل ہے۔'

سپیکر قومی اسمبلی نے سعودی حکومت کی جانب سے پاکستان کے لیے حالیہ تین ارب ڈالر کے اقتصادی پیکج کو بھی سراہا۔ 

انہوں نے مزید کہا کہ 'سعودی عرب میں کام کرنے والے پاکستانی تارکین وطن کو درپیش مسائل کے حل کے بارے میں موجودہ حکومت غور کر رہی ہے۔'

'سعودی عرب میں مقیم پاکستانیوں کا پاکستان کی معیشت کو مضبوط بنانے میں اہم کردار ہے۔'

اس موقع پر سعودی سفیر نواف بن سعید المالکی نے کہا کہ سعودی عرب بھی پاکستان کے ساتھ اپنے برادرانہ تعلقات کو بہت اہمیت دیتا ہے اور اسے ایک مخلص دوست اور بھائی سمجھتا ہے۔ 

انہوں نے کہا کہ پاکستان اور سعودی عرب کے مابین برادرانہ اور دوستانہ تعلقات موجود ہیں اور سعودی عرب ہر مشکل گھڑی میں پاکستان کے شانہ بشانہ کھڑا ہے۔

سعودی سفیر نے سپیکر قومی اسمبلی کو سعودی عرب کی مشاورتی اسمبلی کے چیئرمین کے 20 سے 22 دسمبر کے دورے کے بارے میں بھی آگاہ کیا اور انہیں یقین دلایا کہ مسجد الحرام کے امام عبدالرحمٰن بن عبدالعزیز السدیس کو ان کے ساتھ آنے کی درخواست کی جائے گی۔

گذشتہ روز سعودی سفیر نواف بن سعید المالکی کی سربراہی میں سعودی وفد نے وزیر داخلہ شیخ رشید احمد سے ملاقات کی تھی۔