عمرہ اجازت نامے رمضان سے پہلے کب تک جاری ہوں گے؟

وزارت حج و عمرہ  نے کہا ہے کہ ’28 شعبان 31 مارچ 2022 تک اعتمرنا اور توکلنا ایپ کے ذریعے عمرہ اجازت نامے جاری کرائے جاسکتے ہیں‘۔

عمرہ اجازت نامے ایپ ہولڈر اور ان کے مرافقین کے لیے جاری ہوں گے۔ 

عکاظ اخبار کے مطابق عمرہ اجازت نامے کے اجرا کا آخری دن 31 مارچ 2022 ہے۔ رمضان سے دو دن قبل تک اجازت نامے جاری ہوں گے۔ 

اعتمرنا اور توکلنا ایپس میں بکنگ پیج پر دیکھا جا سکتا ہے کہ مارچ میں ہر روز آسانی  سے عمرہ اجازت نامہ مل سکتا ہے۔ مارچ کے تمام ایام گرین  ہیں البتہ ہر ہفتے جمعے کا دن اس  سے مستثنی ہے۔ جس پر سرخ رنگ نظر آرہا ہے اس کا مطلب یہ ہے کہ ماہ مارچ میں ہر جمعے کو اجازت نامے طلب کرنے والوں کا رش ہے۔

وزارت حج و عمرہ نے کہا ہے کہ ’عمرہ اجازت نامے کے وقت اور تاریخ کا انتخاب سوچ سمجھ کر کیا جائے۔ مناسب تاریخ اور وقت کے انتخاب کا فیصلہ آرام دہ ثابت ہوگا‘۔ 

بیرون مملکت سے آنے والے عمرہ زائرین کے حوالے سے وزارت حج نے کہا ہے کہ ’اجازت نامے کے اجرا کے لیے کورونا ویکسین کی تمام خوراکیں لینا ضروری ہیں‘۔

علاوہ ازیں مقیم پلیٹ فارم پر ویکسین کا اندراج اور سعودی عرب آتے وقت پی سی آر ٹی سرٹیفکیٹ پیش کرنا بھی ضروری ہے۔ متعلقہ فضائی کمپنی یا سعودی محکمہ پاسپورٹ سے رابطہ کرکے مزید تفصیلات حاصل کی جاسکتی ہیں۔

وزارت حج و عمرہ نے پھر ہدایت کی ہے کہ’ نیا عمرہ اجازت نامہ  دس روز بعد ہی جاری کرایا جاسکے گا۔ یہ  پابندی مسجد الحرام اور مسجد نبوی میں کورونا ایس او پیز کی احتیاطی تدابیر کے حوالے سے لگائی گئی ہے‘۔ 

وزارت حج و عمرہ نے کہا کہ’ عمرہ اجازت نامہ مقررہ وقت سے چار گھنٹے قبل تک منسوخ کیا جاسکتا ہے اور اسی وقت دوسرا اجازت نامہ جاری کرایا جاسکتا ہے‘۔