بند مقامات پر ماسک کی پابندی ختم، توکلنا سٹیٹس دکھانا غیرضروری

سعودی وزارت داخلہ نے کورونا کے احتیاطی تدابیر میں مزید نرمی کرتے ہوئے حرمین شریفین کے علاوہ بند مقامات(اِن ڈور) میں ماسک کی پابندی ختم کرنے کا اعلان کیا ہے۔

سعودی پریس ایجنسی کے مطابق وزارت نے یہ فیصلہ کورونا کی شرح میں کمی اور ویکسین شدہ افراد کی شرح میں اضافے کے باعث کیا ہے۔

وزارت داخلہ نے اعلامیہ جاری کرتے ہوئے کہا ہے کہ ’کورونا کے انسداد کے لیے کام کرنے والے اداروں کی تجویز پر غور کرنے کے بعد حفاظتی تدابیر میں نرمی کا فیصلہ کیا گیا ہے۔‘

وزارت نے کہا ہے کہ ’مسجد الحرام اور مسجد نبوی کے علاوہ تمام بند مقامات میں ماسک کی پابندی ضروری نہیں رہی۔‘

’اس فیصلے سے استثنیٰ صرف ان اداروں یا پبلک ٹرانسپورٹ یا تقریب گاہوں کو ہوگا جو حفاظتی تدابیر پر عمل کرنا ضروری سمجھتے ہیں۔‘

’علاوہ ازیں فیصلے سے استثنی کورونا کے انسداد کے لیے کام کرنے والے ادارے کی طرف سے جاری تجاویز پر ہوگا اگر وہ کسی مقام پر ماسک کی پابندی کو ضروری سمجھتے ہیں۔‘

’تجارتی و سرکاری اداروں کے علاوہ پبلک ٹرانسپورٹ اور جہازوں میں سوار ہونے کے لیے توکلنا میں سٹیٹس دکھانے کی پابندی ختم کی جارہی ہے۔‘

’اس فیصلے سے استثنیٰ صرف ان نجی و سرکاری اداروں کو ہوگا جن کے کام کی نوعیت ایسی ہو جہاں داخلے کے لیے ویکسین کی خوارکیں مکمل کرنے کا ثبوت پیش کرنا ضروری ہے‘۔

’علاوہ ازیں جو ادارے، پبلک ٹرانسپورٹ یا سماجی تقریبات کی انتظامیہ اگر حفاظتی تدابیر پر عمل کرنا ضروری سمجھے تو داخلے سے پہلے شرکا کا توکلنا سٹیٹس دیکھا جا سکتا ہے۔‘

وزارت داخلہ نے کہا ہے کہ ’سعودی شہری جو بیرون ملک جانا چاہتے ہوں، ان کے لیے کورونا کی تیسری خوراک کی مدت میں توسیع کردی گئی ہے۔‘

’پہلے ضروری تھا کہ دوسری خوراک کے تین ماہ بعد تیسری خوراک لی جائے، اب یہ مدت 8 ماہ کر دی ہے کہ دوسری خوراک کے 8 ماہ کے بعد تیسری خوراک لینا ضروری ہے۔‘

’اس فیصلے سے صرف ان لوگوں کو استثنیٰ حاصل ہے جنہیں وزارت صحت نے اجازت دے رکھی ہے۔‘

وزارت داخلہ نے کہا ہے کہ ’کورونا کے انسداد کے لیے معاشرے کے تمام افراد کے لیے ویکسین کی خوراکیں مکمل کرنا ضروری ہے۔‘

’علاوہ ازیں نرمی کے باوجود ذاتی طور پر احتیاطی تدابیر پر عمل کرنا بڑی اہمیت رکھتا ہے۔‘

وزارت نے کہا ہے کہ ’تمام فیصلوں پر وقفے وقفے سے نظرثانی ہوتی رہے گی۔‘