یمن میں سعودی سفیر کی جاپانی وزارت خارجہ کے معاون وزیر سے ملاقات 

یمن میں سعودی سفیر محمد بن سعید آل جابر نے بدھ کو ریاض میں جاپانی وزارت خارجہ کے معاون وزیر و ڈائریکٹر جنرل برائے مشرق وسطی و افریقہ کانسوکی ناگوکا سے ملاقات کی ہے۔ 

سرکاری خبر رساں ایجنسی ایس پی اے کے مطابق انہوں نے یمنی صدر ڈاکٹر رشاد العلیمی کی قیادت میں صدارتی کونسل کی تائید و حمایت کے معاملے پر بات چیت کی ہے۔

 اقوام متحدہ کی سرپرستی میں جنگ بندی کے سمجھوتے کو کامیاب بنانے اور اسے پائدار مکمل جنگ بندی معاہدے میں تبدیل کرنے کے لیے کوششوں پربھی تبادلہ خیال کیا گیا۔

ملاقات میں شہریوں کی تنخواہیں دینے کے لیے یمن کے سینٹرل بینک میں آمدنی جمع کرنے اور تعز کے راستے جلد از جلد کھولنے کی اہمیت پر بھی زوردیا گیا ہے۔ 

جاپانی عہدیدار نےکہا کہ وہ مملکت کے ساتھ ہیں۔ سعودی عرب نے یمنی معیشت کو سہارا دینے کے لیے جو تین ارب ڈالر امارات کے ساتھ مل کر جمع کرائے ہیں وہ قابل قدراقدام ہے۔