سعودی اور اٹلی کی خلائی ایجنسیوں کے درمیان مفاہمتی یادداشت پر دستخط 

سعودی سپیس کمیشن اور اٹلی کی خلائی ایجنسی نے پیر کو ریاض میں پرامن مقاصد کے لیے خلائی سرگرمیوں کے حوالے سے مفاہمتی یادداشت پر دستخط کیے ہیں۔ 

سرکاری خبر رساں ایجنسی ایس پی اے کے مطابق مفاہمتی یادداشت پرسعودی وزیر خزانہ محمد الجدعان اور اٹلی کے وزیر خارجہ کی موجودگی میں دستخط کیے گئے۔ 

فریقین خلا کے پرامن استعمال میں ایک دوسرے سے تعاون کریں گے۔ خلائی سرگرمیوں کے حوالے سے معلومات کا تبادلہ کیا جائے گا۔

خلائی ٹیکنالوجی کا تبادلہ عمل میں آئے گا اور باہمی دلچسپی کے شعبوں میں دونوں ملکوں کے ماہرین ایک دوسرے کا ساتھ دیں گے۔ 

مملکت کی جانب سے ایگزیکٹیو چیئرمین ڈاکٹر محمد التمیمی اور اٹلی کی جانب سے ایجنسی کے سربراہ  نے مفاہمتی یادداشت پر دستخط کیے ہیں۔ 

یاد رہے کہ سعودی عرب اور اٹلی مختلف شعبوں میں ایک دوسرے سے تعاون کررہے ہیں۔ مفاہمتی یادداشت اسی سلسلے کی ایک کڑی ہے۔ اس کی بدولت علاقائی و بین الاقوامی سطح پر دونوں ملکوں کے درمیان ٹیکنالوجی و خلائی شعبے کے فروغ میں مدد ملے گی۔