رائے شاہنواز -اردو نیوز، لاہور
پاکستان کے صوبہ پنجاب میں سیاسی صورت حال نے پیر کی رات کئی ڈرامائی موڑ لیے ہیں۔ ایک طرف گورنر پنجاب بلیغ الرحمان نے وزیراعلٰی پرویز الٰہی کو اعتماد کا ووٹ لینے کا کہہ دیا ہے، جس کے تحت پنجاب اسمبلی کا اجلاس 21 دسمبر کو سہ پہر چار بجے طلب کیا گیا ہے۔
دوسری طرف اپوزیشن نے وزیراعلٰی، سپیکر اور ڈپٹی سپیکر کے خلاف عدم اعتماد کی تحاریک اسمبلی سیکریٹریٹ میں جمع کروا دی ہیں۔
مزید پڑھیں
یہ اقدامات ایسے وقت میں کیے گئے ہیں جب چیئرمین پاکستان تحریک انصاف عمران خان نے جمعہ 23 دسمبر کو پنجاب اور خیبرپختونخوا کی اسمبلیاں تحلیل کرنے کا اعلان کر رکھا ہے۔
قانونی ماہرین کے مطابق پنجاب کی اپوزیشن کے ان اقدامات نے پنجاب اسمبلی کی فوری تحلیل کے عمل کو روک دیا ہے۔
گورنر پنجاب محمد بلیغ الرحمان نے وزیراعلٰی پنجاب کو اعتماد کا ووٹ لینے کی ہدایت کرتے ہوئے تحریری طور پر کہا ہے کہ ’پرنٹ اور الیکٹرانک میڈیا پر کافی دنوں سے یہ بات گردش کر رہی ہے کہ وزیراعلٰی چوہدری پرویز الٰہی اپنے پارٹی صدر چوہدری شجاعت حسین اور اپنی پارٹی کے اراکین کا اعتماد کھو چکے ہیں۔‘
’گذشتہ کچھ ہفتوں سے دونوں حکومتی اتحادی جماعتوں کے مابین سیاسی سٹریٹیجی، اسمبلی کی تحلیل، ترقیاتی سکیموں اور سرکاری افسروں کی ٹرانسفر کے حوالے سے سنجیدہ نوعیت کے اختلافات پیدا ہو چکے ہیں۔‘
انہوں نے اعتماد کا ووٹ لینے کے آرڈر میں مزید لکھا ہے کہ ’وزیراعلٰی نے ایک رکن پنجاب اسمبلی خیال احمد کاسترو کو کابینہ میں شامل کیا لیکن پی ٹی آئی چیئرمین نے اس سے لاعلمی کا اظہار کیا جس سے دونوں جماعتوں میں اختلافات صاف ظاہر ہیں۔ کابینہ کے ایک رکن سردار حسنین بہادر دریشک کی کابینہ اجلاس کے دوران تلخ کلامی ہوئی جس پر وہ مستعفی ہو گئے، یہ بھی اختلافات کا شاخسانہ ہے۔‘
آرڈر کے متن کے مطابق ایک وجہ یہ بھی بیان کی گئی ہے کہ ’وزیراعلٰی چوہدری پرویز الہی نے چار دسمبر کو ٹی وی انٹرویو میں کہا کہ وہ آئندہ مارچ تک اسمبلی تحلیل نہیں کریں گے۔ وزیراعلٰی کا یہ بیان پی ٹی آئی کی پارٹی پالیسی کے خلاف تھا جس پر دو اراکین مستعفی بھی ہو گئے۔‘
’17 دسمبر کو وزیراعلٰی نے عمران خان کی جانب سے سابق آرمی چیف کے خلاف کمنٹس دینے پر انٹرویو میں عمران خان کو خوب تنقید کا نشانہ بنایا۔ پنجاب اسمبلی کے ایوان میں حکومتی اتحاد اور اپوزیشن اتحاد میں بہت کم عددی فرق ہے۔ میں بطور گورنر اس بات پر متفق ہوں کہ وزیراعلٰی چوہدری پرویز الٰہی ایوان کی اکثریت کا اعتماد کھو چکے ہیں اس لیے آئین کے آرٹیکل 130 (7) کے تحت میں بدھ 21 دسمبر کو سہ پہر چار بجے پنجاب اسمبلی کا اجلاس طلب کرتا ہوں جس میں وزیراعلٰی اعتماد کا ووٹ لیں۔‘
اپوزیشن نے عدم اعتماد اس وقت جمع کروائی جب گورنرپنجاب وزیراعلی کو اعتماد کا ووٹ لینے کا آرڈر کر چکے تھے۔ دوسرے لفظوں میں اعتماد کا ووٹ لینے کے لیے بلائے گئے اجلاس سے پہلے اب پرویز الٰہی اسمبلی تحلیل نہیں کر سکتے کیوںکہ آئین کے مطابق جب عدم اعتماد کی تحریک پیش ہو جاتی ہے تو وزیراعلٰی کے پاس اسمبلی تحلیل کرنے کا آپشن ختم ہو جاتا ہے۔
