Sorry, you need to enable JavaScript to visit this website.

اوورسیز پاکستانی ڈرائیونگ لائسنس کی آن لائن تجدید کیسے کروائیں؟  

اوورسیز پاکستانی کسی بھی ملک میں بیٹھ کر اپنا لائسنس آن لائن تجدید کروا سکتے ہیں۔ فوٹو: اسلام آباد پولیس ٹوئٹر
اگر آپ اوورسیز پاکستانی ہیں اور آپ نے اسلام آباد سے اپنا ڈرائیونگ لائسنس بنوایا تھا لیکن طویل عرصے سے پاکستان نہ آنے کی وجہ سے اس کی میعاد ختم ہو چکی ہے تو اب آپ کو پریشان ہونے کی ضرورت نہیں ہے۔ آپ دنیا کے کسی بھی ملک میں بیٹھ کر اپنا لائسنس آن لائن تجدید کروا سکتے ہیں۔  
اس سلسلے میں اسلام آباد پولیس نے ایک ویب پورٹل قائم کیا ہے جس کے ذریعے اوورسیز پاکستانی اپنے ڈرائیونگ لائسنس کی تجدید کے لیے اپلائی کر سکتے ہیں اور پندرہ دنوں کے اندر نیا لائسنس جاری کر دیا جائے گا۔  
اگر کسی پاکستانی کے لائسنس کو ایکسپائر ہوئے 30 دن سے تین سال گزر چکے ہیں تو وہ تجدید کے لیے اپلائی کر سکتا ہے لیکن اس کے لیے کچھ شرائط پوری کرنا ہوں گی۔
جیسے ایک سال سے زائد کی تاخیر پر جرمانہ ادا کرنا ہوگا جبکہ تین سال کا عرصہ گزر جانے پر جس ملک میں مقیم ہیں وہاں سے حاصل کیے گئے ڈرائیونگ لائسنس کی کاپی اپلائی کرتے وقت اپ لوڈ کرنا ہوگی۔  
کون کون سی دستاویزت کی ضرورت ہے؟ 
اوورسیز پاکستانیوں کو اپنے لائسنس کی تجدید سے پہلے کچھ ضروری دستاویزات تیار کرنا ہوں گی جن میں پاسپورٹ سائز تصویر جس کا بیک گراونڈ سفید ہو، میڈیکل سرٹیفکیٹ جس کے لیے فارم بی ویب سائٹ پر اپ لوڈ کیا گیا ہے اسے مجاز ڈاکٹر سے تصدیق کروانا ہوگا۔
اس میڈیکل سرٹیفکیٹ میں ڈاکٹر تصدیق کرے گا کہ آپ کسی ایسی بیماری کا شکار نہیں ہیں جس سے ڈرائینگ کے دوران آپ خود یا کسی دوسرے کو نقصان پہنچانے کا باعث بن سکتے ہیں۔ 
اس کے علاوہ اسلام آباد ٹریفک پولیس کی جانب سے جاری کیا گیا پرانا ڈیجیٹل لائسنس بھی آپ کے پاس ہونا ضروری ہے۔ نادرا سے بائیو میٹرک ویری فکیشن کی تصویر، فیس جمع کرانے کی رسید، پاکستان میں لائسنس وصول کرنے والے کے لیے اتھارٹی لیٹر جس کی میزبان ملک کے روٹری سے تصدیق لازمی ہے۔ 

لائسنس کو ایکسپائر ہوئے تین سال کا عرصہ گزرنے کی صورت میں بھی تجدید کروایا جا سکتا ہے۔ فوٹو: اے ایف پی

نادرا سے بائیو میٹرک ویری فیکیشن کے لیے پاکستانی سفارت خانوں میں قائم نادرا سینیٹر جا کر تصدیق کروا کر اس کا پرنٹ لانا ہوگا جو اپلائی کرتے وقت اپ لوڈ کیا جائے گا۔ اگر کوئی اوورسیز پاکستانی اسلام آباد سے باہر کسی ضلع سے تعلق رکھتا ہے لیکن اس کے پاس اسلام آباد ٹریفک پولیس کا لائسنس موجود ہے اور وہ پاکستان آیا ہوا ہو تو وہ اپنے قریبی نادرا سینیٹر سے بھی تصدیق کروا سکتا ہے اور اسلام آباد آئے بغیر آن لائن لائسنس تجدید کی سہولت حاصل کر سکتا ہے۔  
لائسنس تجدید کے لیے اپلائی کرنے کا طریقہ کار  
لائسنس تجدید کے لیے سب سے پہلے آپ کو اسلام آباد پولیس کی ویب سائٹ https://ict.islamabadpolice.gov.pk:4433/dl/signin.php پر جا کر اپنا اکاؤنٹ بنانا ہوگا جس کے لیے شناختی کارڈ کا نمبر، ایکسپائری کی تاریخ، ای میل اور خفیہ پاسورڈ درج کرنا ہوگا۔
اکاؤنٹ بن جانے کے بعد شناختی کارڈ نمبر اور بنائے گئے خفیہ پاسورڈ کے ذریعے لاگ ان ہوں اور اپلائی کرنے سے پہے دیا گیا ہدایت نامہ غور سے پڑھیں اور متعقلہ دستاویزات اپنے سسٹم میں محفوظ کر لیں۔  
دستاویزات مکمل تیار کرنے اور کمپیوٹر میں محفوظ کرنے کے بعد اپلائی کرنے کے لیے آن لائن درخواست فارم کو مکمل کریں جس میں شناختی کارڈ کے مطابق نام، پتہ، لائسنس کا نمبر، پاسپورٹ نمبر اور دیگر معلومات داخل کرنا ہوں گی۔ اس کے بعد تمام دستاویزات کو باری باری متعقلہ خانے میں اپ لوڈ کرتے جائیں۔  
مکمل جانچ پڑتال کے بعد 15 دنوں کے اندر تجدید شدہ لائسنس جاری کر دیا جائے گا۔
اسلام آباد سے تعلق رکھنے والے بیرون ملک مقیم شہری اپنے کسی عزیز کے ذریعے اسلام آباد پولیس کے سہولت مرکز میں اوورسیز پاکستانیوں کے لیے قائم ڈیسک سے یہ لائسنس حاصل کر سکتے ہیں تاہم اس کے لیے اتھارٹی لیٹر لانا لازمی ہوگا۔
جبکہ دیگر شہروں میں رہنے والے یا بیرون ملک لائسنس کی ڈیلیوری کروانے کے خواہش مند افراد کو ڈیلیوری چارجز ادا کرنا ہوں گے اور لائسنس ان کی دہلیز پر پہنچا دیا جائے گا۔  

شیئر: