Sorry, you need to enable JavaScript to visit this website.

سعودی الاتحاد کلب کا کریم بنزما کے ساتھ 2026 تک باضابطہ معاہدے کا اعلان

ٹویٹ پر کیپشن تحریر کیا گیا کہ اب کریم بنزما یہاں ہے (فوٹو: ٹوئٹر الاتحاد کلب)
سعودی عرب کے الاتحاد کلب نے ریال میڈرڈ کے فرانسیسی سٹرائیکر کریم بنزما کے ساتھ 2026 تک باضابطہ معاہدے کا اعلان کیا ہے۔
الاتحاد کلب کے ٹوئٹر اکاونٹ پر معاہدے پر دستخط کی وڈیو بھی شیئر کی گئی ہے۔
ٹویٹ پر کیپشن تحریر کیا گیا کہ اب کریم بنزما یہاں ہے۔ نیا شیر دھاڑے گا۔ فرانسیسی سٹرائیکر کو الاتحاد کلب میں خوش آمدید۔
عرب نیوز کےمطابق سعودی پرو لیگ چیمپیئنز الاتحاد نےمنگل کو اعلان کیا ہے کہ اس نے  کریم بنزما کے ساتھ معاہدے پر دستخط کی شرائط سے اتفاق کیا ہے‘۔
کلب کا کہنا ہے کہ ’فرانسیسی سپر سٹار ابتدائی تین سال کے معاہدے میں شامل ہوں گے‘۔
کریم بنزما کا میڈرڈ میں میڈیکل کرایا گیا اور اس ہفتے کے آخر میں جدہ میں سپر سٹار کا خیر مقدم کیا جائے گا۔
کریم بنزما کا کہنا ہے کہ ’میں ایک مختلف ملک میں ایک نئی فٹبال لیگ کا تجربہ کرنے کےلیے پر جوش ہوں‘۔
’الاتحاد کی ایک حیرت انگیز تاریخ ہے, ناقابل یقین حد تک پر جوش شائقین اور فٹ بال لیگ جیتنے کے بعد ایشیا میں ایک طاقت بننے جیسے بڑے عزائم ہیں‘۔
سپر سٹارنے کہا کہ ’میں اپنے کیریئر میں حیرت انگیز چیزیں حاصل کرنے، سپین اور یورپ میں ہر ممکن کامیابی کے حصول کے حوالے سے خوش قسمت رہا ہوں‘۔
’اب یہ محسوس ہوتا ہے کہ ایک نئے چیلنج اور پروجیکٹ کےلیے یہ صحیح وقت ہے۔ میں نے جب بھی سعودی عرب کا دورہ کیا میں نے ہمیشہ مداحوں اور لوگوں کی طرف سے گرمجوشی اور محبت محسوس کی ہے‘۔
کریم بنزما نے کہا کہ ’یہ ایک اچھی لیگ ہے اور بہت سے اچھے کھلاری ہیں۔ کرسٹینانو رونالڈو پہلے ہی وہاں موجود ہیں۔ ایک دوست جس سے ظاہر ہوتا ہے کہ سعودی عرب اپنی سطح کو مزید بڑھا رہا ہے۔ میں یہاں جیتنے آیا ہوں جیسا کہ میں نے یورپ میں کیا تھا۔ میں آپ کو جدہ میں دیکھنے کےلیے بہت پر جوش ہوں‘۔
الاتحاد کلب کے صدر انمار بن عبداللہ نے کہا کہ’ ریال میڈرڈ سے موجودہ بیلن ڈی آر ہولڈر کے ساتھ معاہدے پر دستخط کرنا کلب کےلیے ایک اورتاریخی سنگ میل ہے‘۔
قبل ازیں فرنسیسی کلب ریال میڈرڈ نے کہا تھا کہ کریم بنزما لالیگا کلب میں 14 سال رہنے کے بعد اسے چھوڑ دیں گے۔
خیال رہے پچھلے ہفتے الاتحاد کلب نے کرسٹیانو رونالڈو کی ٹیم النصر کو ہرا کر 14 سال بعد پہلی مرتبہ سعودی پرو لیگ کا ٹائٹل اپنے نام کرلیا تھا۔
کریم بنزما الاتحاد کلب کو ’فری ایجنٹ‘ کے طور پر جوائن کریں گے۔
عرب نیوز کے مطابق سعودی عرب کی موجودہ چیمپیئن فٹبال کلب الاتحاد کے شائقین نے عالمی شہرت یافتہ فٹبال کلب رئیل میڈرڈ کے کھلاڑی کریم بینزیما سے معاہدے کا خیر مقدم کیا ہے۔

شیئر: