لاہور... پاکستان سپر لیگ میں چھٹی ٹیم کے طور پر ملتان کا اضافہ ہوگیا 5.2 ملین ڈالرز کے ساتھ یہ پی ایس ایل کی مہنگی ترین ٹیم بھی بن گئی ۔پاکستان سپر لیگ کے ابتدائی دو ایڈیشنز میں 5 ٹیموں پشاور زلمی، کراچی کنگز، لاہور قلندرز، کوئٹہ گلیڈی ایٹرز اور اسلام آباد یونائیٹڈنے حصہ لیا اب تیسرے ایڈیشن کیلئے چھٹی ٹیم کا اضافہ کردیا گیا ۔2017 کے ایڈیشن سے قبل بھی گزشتہ سال چھٹی ٹیم کے اضافے کی کوشش کی گئی تھی لیکن پانچوں فرنچائزوں نے اس وقت چھٹی ٹیم کی شمولیت کی مخالفت کی تھی جس کے بعد اسے موخر کردیا گیا تھا۔پاکستان سپر لیگ کے پہلے اور دوسرے ایڈیشن کی شاندار کامیابی کے بعد پی ایس ایل تھری میں چھٹی ٹیم کے لئے پی سی بی کو دس سے زائد بڑی پیشکش موصول ہوئیں البتہ دبئی سے تعلق رکھنے والے بڑے پراپرٹی گروپ نے 5.2ملین ڈالر کی بڑی پیشکش کے بعد ملتان ٹیم اپنے نام کرلی۔ اس سے قبل سب سے مہنگی ٹیم کا اعزاز کراچی کنگز کے پاس تھا 2.6 ملین ڈالر کے ساتھ سب سے مہنگی ٹیم تھی۔
