حج درخواستیں جمع کروانے کی تاریخ میں 22 دسمبر تک توسیع

سرکاری حج سکیم کے تحت درخواستیں جمع کروانے کی تاریخ میں 22 دسمبر تک توسیع کردی گئی ہے۔

ترجمان مذہبی امور کے مطابق ’عازمینِ حج کے اصرار پر وزارتِ مذہبی امور نے درخواستوں کی وصولی میں 10 دن کی توسیع کا اعلان کیا ہے۔‘

ترجمان کا مزید کہنا ہے کہ ’سپانسرشپ سکیم میں پہلے آئیے پہلے پائیے کی بنیاد پر درخواستیں وصول کی جا رہی ہیں۔‘

’بیرون ملک سے  ڈالر میں ادائیگی کرنے والوں کو بغیر قرعہ اندازی کامیاب قرار دیا جائے گا، جبکہ حجِ بدل پر پانچ سال کی پابندی بھی ختم کر دی گئی ہے۔‘

ترجمان مذہبی امور نے بتایا کہ ’گذشتہ پانچ سال کے دوران حج کرنے والے رواں برس حج درخواست دینے کے اہل ہوں گے۔‘

’اکیلی خاتون حلف نامہ فراہم کرنے پر خواتین کے قابل اعتماد گروپ کے ساتھ حج کرنے کی اجازت ہے۔‘