ریاض سیزن کے چوتھے ایڈیشن میں 10 روزہ ’فوڈ ٹرک فیسٹیول‘ کا آغاز ہوچکا ہے۔
اخبار 24 کے مطابق ریاض سیزن میں فوڈ ٹرک فیسٹیول سعودی انٹرٹینمنٹ اتھارٹی کے زیر اہتمام منعقد کیا جارہا ہے۔
فیسٹول میں سعودی خاندان،غیرملکی، سیاح اور نوجوانوں کی بڑی تعداد شرکت کررہی ہے ۔
شرکا مختلف ممالک کے شیفس کی زیر نگرانی تیار ہونے والے کھانوں سے لطف اندوز ہوتے ہیں۔
فیسٹیول میں 100 فوڈ ٹرک موجود ہیں جہاں انواع و اقسام کے کھانے پیش کیے جاتے ہیں۔ فوڈ ٹرک فیسٹیول میں مقامی اور بین الاقوامی شیفس بھی موجود ہیں۔
لاس اینجلس سے آنے والے ایک امریکی شیف جون جو چکن کی مختلف ڈشیں تیار اور سرو کرنے میں مہارت رکھتے ہیں۔
جون کا کہنا ہے کہ ’مجھے ریاض آکر بے حد خوشی ہوئی ، یہاں دنیا بھر کے شیفس سے ملاقات اور ان کے بنائے ہوئے کھانوں کو ٹیسٹ کرنے کا موقع بھی ملے گا ، سب سے بڑھ کر سعودی کھانوں کے بارے میں معلومات ملیں گی‘۔
فوڈ ٹرک فیسٹیول میں مختلف قسم کی آئسکریم کے بھی ٹرک ہیں۔ جہاں آئس کریم مختلف سٹائل سے پیش بھی کی جارہی ہے۔
فیسٹیول میں لبنان سے آنے والے شیف محمد یوسف نے کہا کہ وہ یہاں آکر بے حد خوش ہیں کیونکہ یہاں کافی لوگ آرہے ہیں اور ہمیں اپنے کھانے دنیا بھر کے لوگوں کو پیش کرنے کا موقع ملے گا۔
