وزیراعظم شہباز شریف کی سعودی عرب کے دورے کے بعد وطن واپسی

پاکستان کے وزیراعظم محمد شہباز شریف سعودی عرب کے دورے اور عمرے کی ادائیگی کے بعد پیر کو جدہ سے پاکستان واپس پہنچ گئے۔

سرکاری خبر رساں ایجنسی ایس پی اے کے مطابق جدہ کے کنگ عبدالعزیز انٹرنیشنل ایئرپورٹ پر کمشنرجدہ شہزادہ سعود بن عبداللہ بن جلوی، ڈپٹی میئر انجینیئرعلی بن محمد القرنی، پولیس ڈائریکٹر میجر جنرل سلیمان بن عمر الطویرب نے انہیں الوداع کیا۔

مکہ مکمرمہ ریجن میں رائل پروٹوکول کے ڈائریکٹر احمد عبداللہ بن ظافر بھی موجود تھے۔

خیال رہے وزیراعظم شہباز شریف عہدہ سبنھالنے کے بعد اپنے پہلے غیرملکی دورے پر سنیچر کو سعودی عرب پہنچے تھے۔ 

وزیراعظم  نے مدینہ منورہ  میں مسجد نبوی میں نوافل اد کیے اور روضہ رسول پر حاضری دی بعد ازاں عمرہ کی ادائیگی کے لیے مکہ مکرمہ پہنچے۔

 بعد ازاں ولی عہد شہزادہ محمد بن سلمان نے اتوار کو مکہ مکرمہ کے الصفا پیلس میں پاکستان کے وزیر اعظم محمد شہباز شریف کا خیرمقدم کیا۔

شہباز شریف نے بحرین کے ولی عہد شہزادہ سلمان بن حمد آل خلیفہ کی موجودگی میں سعودی ولی عہد کے ساتھ افطار بھی کیا۔

باضابطہ ملاقات میں ولی عہد اور شہباز شریف نے سعودی عرب اور پاکستان کے درمیان تاریخی تعلقات،  دوطرفہ تعاون کے پہلووں اور مختلف شعبوں میں انہیں ترقی دینے کے طریقوں کا جائزہ لیا۔

علاوہ ازیں علاقائی اور بین الاقوامی صورتحال میں ہونے والی پیش رفت پر بھی تبادلہ خیال کیا گیا۔

ملاقات میں دونوں رہنماؤں نے دیرینہ برادرانہ تعلقات پر اطمینان کا اظہار اور دو طرفہ تعلقات کو مزید مضبوط بنانے کے عزم کا اعادہ کیا۔