سعودی عرب اور فرانس کی وزارت داخلہ میں سکیورٹی تعاون کا معاہدہ
سعودی وزیرداخلہ نے پیرس میں فرنسیسی ہم منصب سے ملاقات کی ہے (فوٹو: ایس پی اے)
سعودی وزیرداخلہ شہزادہ عبدالعزیز بن سعود بن نایف نے پیر کو پیرس میں فرانس کے ہم منصب برونو ریٹیلیو سے ملاقات کی ہے۔
ایس پی اے کے مطابق فرانسیسی وزارت داخلہ کے ہیڈ کوارٹر میں ہونے والی ملاقات میں دونوں ملکوں کی وزارت داخلہ کے درمیان سکیورٹی سے متعلق متعدد امور پر تبادلہ خیال کیا گیا۔
ان میں منظم جرائم، منشیات کی سمگلنگ اور منی لانڈرنگ کا مقابلہ کرنے کے ساتھ دونوں ملکوں کے درمیان مہارت کے تبادلے کو بڑھانا شامل ہے۔
سعودی عرب اور فرانس کے وزرائے داخلہ نے دونوں ملکوں کی وزارت داخلہ کے درمیان سیکیورٹی تعاون سے متعلق ایک ایگزیکٹیو دستاویز پر دستخط کیے۔
شہزادہ عبدالعزیز بن سعود بن نایف نے کہا’ ملاقات کا مقصد سعودی قیادت کی ہدایات پر عمل کرتے ہوئے دونوں ملکوں کے درمیان سکیورٹی تعاون کو بڑھانا ہے۔‘
انہوں نے مجرمانہ خطرات سے نمنٹے کےلیے فرانس کے ساتھ مشترکہ کوششوں کو بڑھانے کےلیے مملکت کے عزم کا اعادہ کیا ۔
سعودی وزیر داخلہ نے اپنے ہم منصب کو فرانس کے قومی دن کے موقع پر مبارکباد بھی دی۔
اس موقع پر معاون وزیر داخلہ ڈاکٹر ھشام بن عبدالرحمن الفالح، فرانس میں سعودی سفیر فہد بن معیوف الرویلی اور دیگر اعلی عہدیدار بھی موجود تھے۔
