جدہ یونیورسٹی اعلٰی تعلیم کے فورم کی میزبانی کرے گی

جدہ یونیورسٹی، اعلٰی تعلیم کے شعبے میں پہلے ’انٹرنیشنل فورم آن گفٹڈنس اِن ہائر ایجوکیشن‘ کے افتتاح کی تیاری کر رہی ہے۔

یہ ایونٹ 3 اور 4 ستمبر کو یونیورسٹی کے کانفرنس سینٹر میں وزیرِ تعلیم یوسف البنیان کی سرپرستی میں ہوگا۔

عرب نیوز کے مطابق فورم میں ٹیلنٹ رکھنے والے طلبا کے ایوارڈ یافتہ ایسے جدت والے کاموں کو لوگوں کے سامنے رکھا جائے گا جنھیں بین الاقوامی نمائشوں میں پذیرائی مل چکی ہے۔

اس فورم میں ٹیلنٹ کی تلاش، موجودہ پالیسیوں اور پروگراموں میں ہونے والی مقامی اور بین لاقوامی پیشرفت کو نمایاں کیا جائے گا جو مقامی اور عالمی سطح پر ذہین طلبا کی دیکھ بھال کے لیے وقف ہے۔

فورم میں لیبرمارکیٹ میں، قومی صلاحیتوں میں اضافہ کرنے کے ایک اہم ذریعے کےطور پر جدت پسندی کی حوصلہ افزائی بھی کی جائے گی۔

اس ایونٹ کا مقصد یونیورسٹیوں میں ذہین طلبہ، ان کے خاندانوں اور دیگر سٹیک ہولڈرز کے درمیان آگاہی کی اہمیت اجاگر کرنی ہے تاکہ ایسے طباع طلبہ کو تعاون حاصل ہو سکے۔

دو روزہ فورم میں اہم سیشن ہوں گے اور پینل ڈسکشن بھی کی جائے گی۔ اس کے علاوہ ان دو دنوں میں ثقافتی مقابلے، انٹر ایکٹیو نمائشیں اور خصوصی ورکشاپس کا انعقاد بھی کیا جائے گا جن میں شرکا کے لیے کئی قسم کی سرگرمیاں ترتیب دی گئی ہیں۔

منتظمین کہتے ہیں کہ اس فورم کا مقصد ٹیلنٹ کی ترقی اور ذہین طلبلہ کو اعلٰی تعلیم کے میدان میں لانے کی کی عہد کی پاسداری کرنا ہے۔

یہ اقدامات عالمی تبدیلیوں کے ہم پلہ ہیں اور مملکت کے وژن 2030 کے پائیدار ترقی کے نصب العین سے مطابقت رکھتے ہیں۔

ایونٹ میں اس بات پر بھی تحقیق بھی کی جائے گی کہ مستقبل میں یونیورسٹیوں میں ٹیلنٹ کی نگہداشت کس طرح کی جانی چاہیے۔

اعلٰی تعلیم کے اداروں کو درپیش چیلنجز اورسعودی اور بین الاقوامی جامعات میں تعلیمی ماحول اور ٹیلنٹ پروگرامز کو بہتر بنانے کے حل بھی تجویز کیے جائیں گے۔

اس فورم میں اعلٰی تعلیم سے وابستہ پبلک اور پرائیویٹ تعلیمی اداروں کے  فیکلٹی کے ارکان اور رہنما، سکول ٹیچر، ذہین اور تخلیقی صلاحیتیوں کے حامل طلبا اور ان کے اہلِ خانہ، ٹیلنٹ سینٹرز کے ڈائریکٹر اور نگران اور سماجی کارکنان بھی شرکت کریں گے۔

علاوہ ازیں ماہرینِ نفسیات، ٹیلنٹ، امتیاز، جدت پسندی، اور تخلیق کے میدان میں تحقیق کرنے والے بھی شرکت کریں گے۔ توقع ہے کہ ذہین  اور باصلاحیت طلبا اور اعلٰی تعلیم سے وابستہ افرا بھی اس دو روزہ فورم کا حصہ ہوں گے۔