سعودی سفیر سے محسن نقوی کی ملاقات، انڈیا کے ساتھ کشیدگی میں سعودی عرب کے مخلصانہ کردار پر اظہار تشکر

سعودی عرب کے پاکستان میں سفیر نواف بن سعید احمد المالکی سے وزیرِ داخلہ محسن نقوی کی ملاقات ہوئی ہے۔

وزارت داخلہ کی جانب سے جاری بیان کے مطابق سنیچر کو ملاقات میں پاکستان انڈیا کشیدگی کے دوران سعودی حکومت کا مخلصانہ، برادرانہ اور مؤثر کردار ادا کرنے پر محسن نقوی نے سفیر سے اظہار تشکر کیا۔

وزیر داخلہ کی سعودی عرب کے سفارتخانے آمد پر سفیر نواف بن سعید نے ان کا خیر مقدم کیا۔

بیان کے مطابق محسن نقوی نے کہا کہ جنگ ہو یا امن سعودی عرب نے ہر موقع پر پاکستان کا بھرپور ساتھ دیا ہے، پاکستان اور سعودی عرب کے تعلقات ہر آزمائش پر پورا اترے ہیں۔

اس موقع پر سعودی سفیر کا کہنا تھا کہ پاکستان ہمارا برادر دوست ملک ہے، سعودی عرب پاکستان کے ساتھ تعلقات کو انتہائی اہمیت دیتا ہے۔