امریکہ نے ان تمام ممالک کے شہریوں پر 250 ڈالر کی اضافی ’ویزا انٹیگریٹی فیس‘ عائد کر دی ہے جو ویزا چھوٹ کے زمرے میں نہیں آتے۔ یہ نئی فیس یکم اکتوبر سے نافذ العمل ہو گی۔
برطانوی خبر رساں ادارے روئٹرز نے سنیچر کو اپنی ایک رپورٹ میں کہا ہے کہ اس فیصلے سے امریکہ کی پہلے سے متاثرہ سفری صنعت کو مزید دباؤ کا سامنا ہو سکتا ہے۔
امریکی حکومت کے مطابق جولائی میں غیرملکی سیاحوں کی آمد میں تین اعشاریہ ایک فیصد کمی ریکارڈ کی گئی جو ایک کروڑ 92 لاکھ رہی۔
مزید پڑھیں
-
امریکہ نے چپ بنانے والی کمپنی انٹیل میں 10 فیصد شیئرز خرید لیےNode ID: 893734 -
-
رواں برس کا یہ پانچواں مہینہ ہے جس میں سیاحوں کی تعداد میں کمی دیکھی گئی ہے۔
ماہرین کا کہنا ہے کہ سنہ 2025 میں سیاحوں کی تعداد وبا سے پہلے کے سات کروڑ 94 لاکھ کے ہدف کو عبور کرنے کی توقع کی جا رہی تھی لیکن موجودہ رجحانات اس کے برعکس ہیں۔
نئی عائد کردہ فیس کے بعد امریکہ کا وزیٹر ویزا حاصل کرنے کی مجموعی لاگت 442 ڈالر ہو جائے گی جو دنیا بھر میں بلند ترین ویزا فیسوں میں شمار ہوتی ہے۔
یہ فیس ان ممالک کے شہریوں کو متاثر کرے گی جو ویزا چھوٹ کے زمرے میں نہیں آتے جن میں انڈیا، چین، برازیل، ارجنٹینا اور میکسیکو شامل ہیں۔
عالمی سفری کمپنی آلٹور کے صدر گیب ریزی نے کہا ہے کہ ’مسافروں کے لیے کسی بھی قسم کی رکاوٹ سفر کی تعداد کو کم کرتی ہے۔ جیسے جیسے گرمیوں کا موسم ختم ہو رہا ہے، یہ مسئلہ مزید سنگین ہوتا جائے گا۔‘
ورلڈ ٹریول اینڈ ٹورازم کونسل کے مطابق سنہ 2025 میں بین الاقوامی سیاحوں کی جانب سے امریکہ میں خرچ کی جانے والی رقم 169 ارب ڈالر سے کم رہنے کا امکان ہے جو 2024 میں 181 ارب ڈالر تھی۔
ڈونلڈ ٹرمپ انتظامیہ نے حال ہی میں طلبہ، ثقافتی تبادلے کے شرکاء اور میڈیا کے افراد کے ویزا دورانیے کو محدود کرنے کی تجاویز بھی پیش کی ہیں۔
اس کے علاوہ کچھ سیاحتی اور کاروباری ویزوں کے لیے 15 ہزار ڈالر تک کی ضمانت کی شرط بھی رکھی گئی ہے تاکہ ویزا کی مدت سے زیادہ قیام کرنے والوں پر قابو پایا جا سکے۔
دوسری جانب وسطی اور جنوبی امریکہ سے امریکہ آنے والے سیاحوں کی تعداد میں رواں برس اضافہ دیکھا گیا تھا جس پر اس نئی فیس کا اثر پڑنے کا خدشہ ہے۔
مئی تک میکسیکو سے سفر میں 14 فیصد، ارجنٹینا سے 20 فیصد اور برازیل سے چار اعشاریہ چھ فیصد اضافہ ریکارڈ کیا گیا۔ چین اور انڈیا سے آنے والے سیاحوں کی تعداد میں کمی دیکھی گئی ہے۔
ماہرین کا کہنا ہے کہ امریکہ کی سخت ویزا پالیسیوں کے باعث دیگر ممالک بھی جوابی اقدامات کر سکتے ہیں جس سے عالمی سطح پر سفری رجحانات متاثر ہو سکتے ہیں۔
چنگیندو میں چینی فرم ‘موومنٹ ٹریول‘ کے بانی سُو شو نے کہا کہ ’امریکہ ہمیشہ اپنے مہمانوں کے انتخاب میں محتاط رہا ہے۔ اگر آپ کی مالی حیثیت معیار پر پوری نہیں اُترتی تو ویزا حاصل کرنا ویسے ہی مشکل ہوتا ہے۔‘
ٹریول ایجنٹ اور ’سیاز ٹو ڈے اینڈ ٹریول‘ نامی کمپنی کے مالک جیمز کچن نے کہا کہ ’جب غیرملکی سیاحوں کے لیے داخلے کی فیسیں بڑھائی جا رہی ہیں تو امریکی مسافر اس بات پر فکرمند ہیں کہ بیرونِ ملک ان پر سخت شرائط عائد کی جا سکتی ہیں۔‘
انہوں نے کہا کہ مسافروں نے آئندہ مہینوں میں ممکنہ طور پر عائد کی جانے والی باہمی فیسوں کے بارے میں تشویش کا اظہار کیا ہے۔
