لیبرکیمپس ضوابط: 20 کارکنوں والے اداروں کے لیے مقررہ رہائشی پرمٹ لازمی
لیبرکیمپس ضوابط: 20 کارکنوں والے اداروں کے لیے مقررہ رہائشی پرمٹ لازمی
جمعرات 18 ستمبر 2025 5:27
خلاف ورزی کے مرتکب ادارے کی بعض سروسز بند کر دی جائیں گی۔ فوٹو: ایکس اکاؤنٹ
ملازمین کی اجتماعی رہائش کے پروگرام کا کہنا ہے کہ وہ ادارے یا کمپنیاں جہاں ملازمین کی تعداد 20 یا اس سے زیادہ ہے وہ اپنے کارکنوں کی رہائش ’لیبرکیمپس‘ کے لیے ’بلدی‘ پلیٹ فارم سے پرمٹ حاصل کرنے کی درخواستیں جمع کرسکتے ہیں۔
اخبار 24 نے لیبر کیمپس پروگرام کے حوالے سے مزید کہا ہے کہ کیمپس کے لیے مقررہ ضوابط جاری کیے گئے ہیں جن پر مرحلہ وار عمل کیا جاتا ہے۔
پروگرام کا مقصد لیبرکیمپوں میں معیار کو بلند کرنا اور کارکنوں کو رہائش کے حوالے سے بہتر ماحول فراہم کرنا ہے جو بلدیہ کے مقرر کردہ ضوابط کے مطابق ہو۔
پروگرام نے اس بات کی یقین دہانی کی ہے کہ وہ ادارے یا کمپنیاں جو مقررہ لائسنس حاصل نہیں کریں گی وہ قانون شکنی کی مرتکب قرار پائیں گی ۔
خلاف ورزی کے مرتکب اداروں کے خلاف قانون کے مطابق کارروائی عمل میں لائی جائے گی جس کے تحت ان کی بعض سرکاری سروسز کو سیز کر دیا جائے گا جن میں اضافی ویزوں کا اجرا اور کارکنوں کی سپانسر شپ ’قوی‘ پورٹل کے ذریعے تبدیلی شامل ہے۔
کارکنوں کےلیے معیاری رہائشی پروگرام نے اس بات پر بھی زور دیا ہے کہ ادارے کی تفتیشی ٹیمیں لائسنس کی جانچ کے لیے وقتا فوقتا کمپنیوں کا دورہ کر کے رپورٹ مرکزی ادارے کو جمع کرائیں گی جن پر کارروائی عمل میں لائی جائے گی۔
رہائشی معیار مقرر کرتے ہوئے کمروں میں فی فرد جگہ بھی مقرر کی گئی ہے (فوٹو، ایکس )
خیال رہے کہ کورونا وبا کے بعد سے مملکت میں لیبر کیمپس کے ضوابط پر سختی سے عمل درآمد کیا جا رہا ہے۔
وزارت بلدیات و ہاؤسنگ کی جانب سے مقررہ ضوابط جاری کیے گئے تھے جن کے مطابق کارکنوں کی رہائشی عمارت اور کمروں کی بناوٹ کے علاوہ فی فرد مقررہ جگہ کی بھی وضاحت کی گئی ہے۔
