پاکستان افغانستان سرحد پر شدید جھڑپیں، جوابی حملے میں کئی افغان پوسٹیں تباہ: پاکستانی سکیورٹی ذرائع

پاکستان اور افغانستان کے درمیان سرحد پر شدید جھڑپیں ہوئی ہیں۔ پاکستانی سکیورٹی ذرائع کا کہنا ہے کہ سنیچر کو افغانستان کی طرف سے پاکستانی پوسٹوں پر بِلااشتعال فائرنگ کی گئی جس کا پاکستانی فوج نے بھرپور اور شدید جواب دیا ہے۔

سکیورٹی ذرائع کے مطابق ’کچھ دیر قبل افغان فورسز نے پاکستان افغانستان بارڈر پر انگور اڈا، باجوڑ، کرم، دیر، چترال، اور بارام چاہ (بلوچستان) کے مقامات پر بِلااشتعال فائرنگ کی۔ فائرنگ کا مقصد خوارج کی تشکیلوں کو بارڈر پار کروانا بھی تھا۔‘

’پاکستان فوج کی چوکس اور مستعد پوسٹوں کی جانب سے تیزی کے ساتھ بھرپور اور شدید جواب دیا گیا جو اب بھی جاری ہے۔‘

سکیورٹی فورسز کے مطابق ’پاکستانی فوج نے فوری طور پر شدید ردعمل دیتے ہوئے متعدد افغان پوسٹوں کو مؤثر طریقے سے نشانہ بنایا۔ پاکستان کی بروقت کارروائی سے افغانستان کی متعدد بارڈر پوسٹیں تباہ اور درجنوں افغان فوجی اور خارجی ہلاک ہو گئے۔‘

سکیورٹی ذرائع نے مزید کہا کہ ’طالبان اپنی متعدد پوسٹیں چھوڑ کر بھی فرار ہو گئے ہیں اور ان کی لاشیں بکھری ہوئی ہیں۔‘

’افغانستان کی جانب سے یہ جارحیت اُس وقت کی جا رہی ہے جب افغان وزیر خارجہ انڈیا کا دورہ کر رہے ہیں۔‘