سعودی وزیر خارجہ کی شرم الشیخ میں امن سربراہی اجلاس میں شرکت

سعودی ولی عہد شہزادہ محمد بن سلمان کی نیابت کرتے ہوئے وزیرخارجہ شہزادہ فیصل بن فرحان نے پیر کو شرم الشیخ میں امن سربراہی اجلاس میں شرکت کی۔

ایس پی اے کے مطابق سربراہی اجلاس کا مقصد غزہ میں جنگ کا خاتمہ اور مشرق وسطی میں امن و استحکام کے لیے کوششوں کو فروغ دینا ہے۔

سربراہی اجلاس مصری صدر عبدالفتاح السیسی اور امریکی صدر ٹرمپ کی مشترکہ صدارت میں ہوا، متعدد ملکوں اور بین الاقوامی تنظیموں کے نمائندوں نے شرکت کی۔

اجلاس کے آغاز میں غزہ معاہدے کا خیرمقدم کیا گیا بعد ازاں امریکی صدر ڈونلڈ ٹرمپ نے مصر، قطر اور ترکی کے رہنماؤں کے ہمراہ اس معاہدے کے ضامن کے طور پر اعلامیے پر دستخط کیے۔

امریکی صدر ڈونلڈ ٹرمپ نے پیر کو علاقائی رہنماؤں کے ہمراہ غزہ میں جنگ بندی کو مضبوط بنانے کے لیے کیے گئے اعلامیے پر دستخط کو ’مشرق وسطیٰ کے لیے شاندار دن‘ قرار دیتے ہوئے اس اہم پیشرفت کا خیرمقدم کیا ہے۔