سخت مقابلے کے بعد سعودی عرب نے فیفا ورلڈ کپ 2026 کے لیے کوالیفائی کر لیا

سعودی عرب نے منگل کے روز جدہ میں ایشیائی کوالیفائرز کے چوتھے مرحلے میں عراق کے خلاف بغیر کسی گول کے برابر میچ کھیل کر 2026 ورلڈ کپ کے لیے کوالیفائی کر لیا۔

اگرچہ جدہ میں موجود تقریباً 60 ہزار شائقین میں سے اکثریت اختتام پر جشن منا رہی تھی، مگر یہ سخت اور تھکا دینے والا میچ دیکھنے کے لحاظ سے بالکل بھی آسان نہیں تھا۔

جدہ کے کنگ عبداللہ سپورٹس سٹی کے الانما سٹیڈیم میں میچ کا آغاز منگل کی رات 9 بجکر 45 منٹ پر ہوا، گرین فالکنز نے میچ کے دونوں ہاف میں گول کرنے کے مواقع گنوا دیے۔

الاخباریہ کے مطابق میچ شروع ہونے سے قبل ہی سٹیڈیم کے تمام سٹینڈز بھر گئے۔ میچ دیکھنے کےلیے سٹیڈیم میں 60 ہزار افراد موجود تھے۔

سعودی وزیر سپورٹس اور دیگر عہدیداروں نے بھی سٹیڈیم میں میچ دیکھا۔

گرین فالکنز نے ساتویں مرتبہ فیفا ورلڈ کپ کے لیے کوالیفائی کرکے ایک تاریخ رقم کی ہے۔

 یاد رہے کہ گرین فالکنز کو فیفا ورلڈ کپ 2026 کوالیفائی کرنے کے لیے عراق کے ساتھ میچ میں کامیابی یا ڈرا درکار تھی۔ اسے گول اوسط کے لحاظ سے عراقی ٹیم پر برتری حاصل تھی۔

جبکہ عراقی ٹیم کو براہ راست کوالیفائی کرنے کے لیے یہ میچ جیتنا ضروری تھا۔ دونوں ٹیمیں ایشیائی پلے آف کے گروپ ’بی‘ میں شامل ہیں۔

اس میچ میں سعودی ٹیم گول کیپر نواف العقیدی، صالح ابو الشامات، حسان تمبکتی، جھاد ذکری، ایمن یحیی، عبداللہ الخیبری، ناصر الدوسری، مصعب الجویر، صالح ابو الشامات، فراس الریکان اور سالم الدوسری پر مشتمل تھی۔

یاد رہے سعودی عرب نے انڈونیشیا کو 3-2 سے شکست دی تھی جبکہ عراق نے اسی ٹیم کو 1-0 سے ہرایا تھا۔