فیوچر انویسٹمنٹ انیشیٹیو کانفرنس، وزیراعظم شہباز شریف ریاض پہنچ گئے

سعودی ولی عہد و وزیرِاعظم شہزادہ محمد بن سلمان کی خصوصی دعوت پر وزیرِاعظم شہباز شریف فیوچر انویسٹمنٹ انیشیٹیو کی نویں کانفرنس میں شرکت کے لیے پیر کی شام ریاض پہنچ گئے ہیں۔

وزیراعظم ہاؤس سے پیر کو جاری ہونے والے بیان کے مطابق کنگ خالد انٹرنیشنل ایئرپورٹ پہنچنے پر ریاض کے نائب گورنر شہزاہ محمد بن عبدالرحمن بن عبدالعزیز، پاکستان میں سعودی عرب کے سفیر نواف بن سعید المالکی اور پاکستان کے سعودی عرب میں سفیر احمد فاروق نے وزیرِاعظم اور پاکستانی وفد کا استقبال کیا۔

نائب وزیرِاعظم و وزیرِ خارجہ سینیٹر محمد اسحاق ڈار، وفاقی وزیرِ خزانہ محمد اورنگزیب، وفاقی وزیرِ اطلاعات و نشریات عطاء اللہ تارڑ، معاونین خصوصی طارق فاطمی اور بلال بن  ثاقب وزیرِاعظم کے ہمراہ اعلی سطح وفد میں شریک ہیں۔

وزیرِاعظم شہباز شریف ریاض میں منعقدہ فیوچر انویسٹمنٹ انیشیٹیو میں  پاکستان کی نمائندگی کریں گے۔

بیان کے مطابق وزیرِاعظم اپنے دورے کے دوران سعودی ولی عہد و وزیرِاعظم شہزادہ محمد بن سلمان سے دو طرفہ ملاقات کریں گے۔ ملاقات میں پاکستان و سعودی عرب کے مابین تجارت، سرمایہ کاری، توانائی اور افرادی قوت کے شعبوں میں تعاون کے مزید فروغ پر گفتگو ہوگی۔ ملاقات میں باہمی دلچسپی کے عالمی و علاقائی امور پر بھی تبادلہ خیال ہو گا۔

وزیرِاعظم فیوچر انویسٹمنٹ انیشیٹیو میں شرکت کے لیے آئے عالمی رہنماؤں اور بین الاقوامی اداروں کے سربراہان سے ملاقاتیں بھی کریں گے۔

پاکستانی دفتر خارجہ کے مطابق وزیراعظم کا دورہ اقتصادی سفارت کاری کو آگے بڑھانے اور سرمایہ کاری، ٹیکنالوجی اور پائیدار ترقی میں سٹریٹجک شراکت داری کو فروغ دینے کے لیے پاکستان کے عزم کو ظاہر کرتا ہے۔

یاد رہے ریاض میں فیوچر انویسٹمنٹ انیشیٹیو (ایف آئی آئی 9) کانفرنس کا آغاز پیر27 اکتوبر سے ہوا ہے جو 30 اکتوبر 2025 تک ریاض کے کنگ عبدالعزیز انٹرنیشنل کنونشن سینٹر میں جاری رہے گی۔

کانفرنس کا موضوع ’خوشحالی کی کنجی‘ ترقی کی نئی سرحدیں کھولنا ہے، اس میں عالمی رہنما، سرمایہ کار اور ماہرین شرکت کررہے ہیں۔

کانفرنس متوقع طور پر آٹھ ہزار سے زیادہ شرکا، 650 سے زیادہ سپیکرز کو 250 سیشنز میں جمع کرے گی۔ مستقبل کے حوالے سے مختلف موضوعات جن میں آزاد تجارت کےجغرافیائی سیاسی اثرات اور دیگر پر بحث کی جائے گی۔